Aliment ödəməyən valideyn 3 ilə qədər HƏBS EDİLƏ BİLƏR - AÇIQLAMA

Tərəflər boşandıqdan sonra yaranan problemlərdən biri də alimentin ödənilməsi ilə bağlıdır. Alimentin ödənilməməsi uzunmüddətli məhkəmə çəkişmələrinə və həbslərə gətirib çıxarır. Bu gün ölkədə alimenti ödəməkdən boyun qaçırma halları tez-tez yaşanır. Uşaqların qayğısına qalmaq, onları tərbiyə etmək valideynlərin borcudur.

Bəs qanunvericiliklə alimenti ödəməyən valideyni hansı cəza gözləyir? Mövzu ilə bağlı Sonxeber.az-a danışan hüquqşünas Şamil Paşayev bildirib ki, sovet düşüncəsindən çıxdığımız üçün Azərbaycanda boşanma hər ailə üçün problem hesab olunur. Boşanmadan sonra insanların bədbəxt olacağı ilə bağlı fikirlər səsləndirilir. Əgər insanlar bir-birilə yaşa bilmirsə, birinin digərinə xəsarət yetirmə və fiziki-psixi zorakılıq halları varsa burada boşanma qaçınılmazdır. İnsanlar ailəsini dağıtmaq üçün xüsusi planla yaşamır. Faiz nisbətilə bu daha azdır:

"Azərbaycanda alimentin verilməsi ilə bağlı ciddi problemlər var. Bu insanlara həm sosial, həm də mental durumu ilə bağlıdır. Azərbaycanda statistika etibarilə kişilər daha çox aliment verirlər. Qanunvericiliklə uşağın kimdə olmağından asılı olmayaraq valideyn alimenti ödəməlidir. Yəni ancaq kişi aliment ödəməlidir deyə bir anlayış yoxdur. Məhkəmələrimiz daha çox uşağın anada qalmasına imkan verirlər. Kişilərin aliment verməsində düşüncə dəyişməlidir. Kişilər başa düşməlidir ki, aliment qadına yox, övladının saxlanma xərclərinə verilir. Bu günləri bir uşağa verilən sabit alimentin məbləği 235 manatdır. 235 manatla bir uşağı normal şəkildə saxlamaq mümkün deyil. Amma 235 manatı qazanan kişilərin sayı da çox deyil. İnsanların sosial vəziyyəti və mental düşüncəsi alimentin verilməsi ilə bağlı problemlər yarada bilər".

Şamil Paşayevin sözlərinə görə, alimentin ödənilməməsi, məhkəmə qərarını icra edilməməsi cinayət və inzibati məsuliyyəti yaradır:

"Valideyn məhkəmənin qərarı ilə inzibati yaxud cinayət məsuliyyətinə cəlb edilsə belə, həyatının hər anında aliment verməyə borcludur. Özü ödəməsə belə əmlakına yönəlmə həyata keçirilməlidir. İnzibati Xətalar Məcəlləsinin 528 ci maddəsinə məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə fiziki şəxslər beş yüz manatdan min manatadək məbləğdə cərimə edilir. İşin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Cinayət Məcəlləsinin 306.1-ci maddəsinə əsasən, qanuni qüvvəyə minmiş məhkəmə qətnaməsini, hökmünü, qərardadını, qərarını və ya əmrini qərəzli olaraq icra etməmə və ya həmin məhkəmə aktlarının icrasına maneçiliyə görə iki min manatdan dörd min manatadək miqdarda cərimə və ya üç yüz iyirmi saatdan dörd yüz səksən saatadək ictimai işlər və ya iki ilədək müddətə islah işləri və ya üç ilədək müddətə azadlığın məhdudlaşdırılması və ya üç ilədək müddətə azadlıqdan məhrumetmə ilə cəzalandırılır".

Sevda Səfərova

Telegramda izləyin