"Kadirovun qəhrəman kimi təltif etdiyi şəxs Azərbaycan dövləti üçün cinayətkardır" - Ramil Süleymanov

"Hüquqi baxımdan Azərbaycanla Rusiya arasında yardımlaşma haqqında hökumətlərarası müqavilə mövcuddur. Eyni zamanda həm Rusiya, həm də Azərbaycan MDB-nin üzvüdür. Bu birliyin üzv dövlətlərinin də arasında hüquqi yardımlaşma, o cümlədən birgə istintaqla bağlı Hüquq Mühafizə Orqanlarının birgə işləməsinə dair müqavilələr mövcuddur".

Bunu Sonxeber.az-a danışan hüquqşünas Ramil Süleymanov bildirib.

Ramil Süleymanov qeyd ki, indiki halda Rusiya dövləti tərəfindən Azərbaycan Respublikasının vətəndaşlarına, hava gəmisinə bu cinayətin törədilməsinin məsuliyyəti dövlət olaraq Rusiyanın üzərindədir:

"Rusiya məsələnin siyasiləşməməsi üçün mütləq şəkildə bunu bilərəkdən və ya bilməyərəkdən törədən şəxs barəsində istintaq aparmalıdır. Dövlətlər arasında imzalanan və beynəlxalq humanitar hüququn tələblərindən biri də budur ki, ölkələr bir-birinin daxili qanunvericiliyinə hörmətlə yanaşırlar. Əgər, bu əməl cinayət olaraq Rusiya tərəfindən istintaq edilərsə və günahkar şəxs qanun qarşısında cəzalanarsa, o zaman Azərbaycan dövləti bununla kifayətlənməli olacaqdır. Burada artıq, vurulmuş zərərin öyrənilməsi gündəmə gələcəkdir. Digər yandan, əgər Rusiya dövləti tərəfindən hər hansı istintaq aparılmazsa Azərbaycan Respublikasının Baş Prokurorluğu tərəfindən cinayət məcəlləsinin müvafiq müddəalarına əsasən cinayət işi başlanacaqdır. Nəticə etibarı ilə həmin şəxsin müəyyən olunaraq Azərbaycana təhvil verilməsi tələb olunacaqdır. O cümlədən, bu cinayəti törətmiş olan artıq məlumdur və həmin şəxsin də xidmətlərinə görə Çeçenistan Respublikasının Prezidenti Ramzan Kadırov tərəfindən təltif mərasimi həyata keçirilmişdir. Qəhrəman kimi təqdim olunan bu şəxs Azərbaycan dövləti üçün cinayətkardır. Onun barəsində hər hansı bir formada hüquqi tədbir görülməzsə Azərbaycan Hüquq Mühafizə Orqanları tərəfindən cinayət işi başlamaqla, həmin şəxsin Azərbaycan təhvil verilməsi barədə müraciət olunacaqdır. Eyni zamanda bu şəxsin insan həyatına qəsdən son qoyması, əmlaka zərər vurması cinayətdir".

Telegramda izləyin