"Pilotlar və bütün ekipaj üzvlərinin qəhrəmanlığı Prezident İlham Əliyev tərəfindən layiqincə qiymətləndirildi" - DEPUTAT

"Prezident İlham Əliyev Bakı-Qroznı istiqaməti üzrə marşrutu yerinə yetirən AZAL-a məxsus təyyarənin Qazaxıstanın Aktau şəhəri yaxınlığında qəzaya uğraması barədə jurnalistə Beynəlxalq hava limanında müsahibə verdi. Cənab Prezident hadisəni eşidən kimi dərhal Sankt-Peterburqa MDB Zirvə görüşünə uçarkən Bakıya qayıtdığını, hava limanında operativ müşavirə keçirdiyini, Dövlət Komissiyasını yaratdığını və müvafiq qurumların nümayəndələrindən ibarət heyət Aktau şəhərinə dərhal ezam etdiyini bildirdi. Ezam olunan nümayəndə heyəti ilk növbədə, təyyarənin qalıqlarının vəziyyəti ilə tanış olmalı, yerində müşahidə aparmalı, video və foto materiallar əldə etməli və onları ictimaiyyətə təqdim etməli idilər. Eyni zamanda, Azərbaycan həkimlərindən ibarət qrup da Aktau şəhərinə ezam edilmişdi. Baxmayaraq ki, Qazaxıstan tərəfi yaralıları sağaltmaq və onlara tibbi xidmət göstərmək üçün əlindən gələni əsirgəmirdi. Bu hadisədə Qazaxıstan höküməti və Qazaxıstan xalqı Azərbaycanın yanında oldular".

Bunu Sonxeber.az-a danışan deputat Şahin Seyidzadə bildirib.

Deputat qeyd edib ki hadisə ilə bağlı ilkin versiyalar üzərində iş başladı:

"Əlbəttə, son versiya "qara qutu"lar açılandan sonra bəlli olacaq. Ancaq ilkin versiyalar da kifayət qədər əsaslıdır və faktlara söykənir. Faktlar isə ondan ibarətdir ki, Azərbaycanın mülki təyyarəsi Rusiya ərazisində, Qroznı şəhərinin yaxınlığında xaricdən zədə almış və idarəetməni demək olar ki, itirmişdir. Onu da bilirik ki, təyyarəmiz radioelektron mübarizə vasitələri tərəfindən idarəolunmaz vəziyyətə salınmışdır. Bu, təyyarəyə yetirilən birinci xətərdir. Eyni zamanda, yerdən açılan atəş nəticəsində təyyarənin quyruq hissəsi də böyük dərəcədə zədələnmişdir və dərhal, elə həmin gün bizim heyətimiz Aktau şəhərində artıq o video materialları təşkil edəndə ictimaiyyət də bu məsələ ilə məlumatlandırıldı. Günahkarlar aydındı və əlbəttə, bu, heç kimə başucalığı gətirmir. Dost ölkə sayılan Azərbaycandan vaxtında üzr istəmək və bunu ictimaiyyətə bildirmək - bütün bunlar görüləsi tədbirlər idi və addımlar idi".

Deputat vurğulayıb ki, qəzanın təfərrüatları tam araşdırılacaq:

"Azərbaycan ilk gündən beynəlxalq ekspertlərdən ibarət qrupun bu işlə məşğul olmasının tərəfdarı idi, maksimum ədalətli olmağa çalışır və ictimaiyyət müntəzəm olaraq bu istintaqın gedişatı ilə bağlı məlumatlandırılacaq.

Sözsüz ki, bu hadisədə bizim pilotlar və bütün ekipaj böyük qəhrəmanlıq, peşəkarlıq və soyuqqanlılıq göstərmişlər. Onlar özləri də qəzadan sağ çıxa bilməyəcəkləri üçün stres vəziyyətində olsalar da, sərnişinləri sakitləşdirmək, təyyarənin içində xaos vəziyyəti yaratmamaq üçün böyük insani davranış göstərmişlər. Prezident İlham Əliyev və Birinci Vitse-Prezident Mehriban Əliyeva vida mərasimində iştirak etmiş və həlak olanların ailə üzvlərinə başsağlığı vermişdir. Onların qəhrəmanlığı Prezident İlham Əliyev tərəfindən layiqincə qiymətləndirilmişdir. Allah bütün həlak olanlara rəhmət eləsin və sağ qalanlara Allahdan şəfa diləyirik".

Telegramda izləyin