"Bağçaların say artımı, həmçinin, alternativ metodların tətbiqi ilə bağlı yeni və təxirəsalınmaz addımlar atılmalıdır" - Təhsil eksperti

Məktəbəqdər təlim və tərbiyə hər uşaq üçün önəmlidir. Amma günümüzdə valideyinlərin çox hissəsi uşaqlarını ürəkrahatlığı ilə bağçalara yola sala bilmirlər. Gündəmdə bağçalarla bağlı müxtəlif zamanlarda, fərqli problemlərə rast gəlinir. Sanki bağçaların sayı çoxalsa da, keyfiyyəti azalır. Təbii ki, istisnalar da var. Amma məhz bu tip bağçalar üçün hansısa tədbirlər görülürmü?

Mövzu ilə bağlı Sonxeber.az-a təhsil eksperti Elmin Nuri danışdı.

Ekspert açıqlmasında bağçaların sayının çox olmasının deyil, az olmasının daha çox problemlərə yol açdığını qeyd edib:

"Azərbaycanda məktəbəqədər təhsil müəssisələri, bağça sayının artırılması və bunun hər hansı problemə səbəb olacağı ilə bağlı fikirlərlə qəti razı deyiləm. Çünki bizdə təəssüf ki, bağçaların sayı onlara olan tələbatdan 4 dəfə azdır. Azərbaycanda hər 4 bağçayaşlı uşaqdan yalnız biri bu imkandan yararlanır. Digər üçü isə sırf bağça sayının çatışmazlığı üzündən bu hüququndan məhruz edilir. Təəssüf ki, bağça sayının azlığı və mövcud bağçalardakı şagird sıxlığı özü-özlüyündə bir sıra problemlərə yol açır ki, bunların da başında nəzarət mexanizmi ilə bağlı yananan boşluqlar dayanır. Konkret olaraq onu bildirmək istəyirəm ki, bizdə bağçalarda bağlı ən ciddi narahatlığın əsas səbəbi onların say çoxluğu deyil, əksinə saylarının azlığı səbəbindən yaranan sıxlıqdır. Məsələn, 150 azyaşlının getməli olduğu bağçada 200-230 nəfər yerləşdirilirsə burada təbii ki, bir neçə istiqamətdə ciddi boşluqlar yaranacaq: nəzarət mexanizmində, təlim-tərbiyə və metodiki işin keyfiyyətində, qidalanmada, uşaqların sağlamlıqlarının qorunmasında... Odur ki, bağçaların say artımı, həmçinin, alternativ metodların tətbiqi ilə bağlı yeni və təxirəsalınmaz addımlar atılmalıdır. Özəl bağçaların sayı təəssüf ki, deyilənlərin əksinə olaraq o qədər də çox deyil. Hazırda 2023-cü ilin rəqəmlərinə əsasən ölkədə qeydiyyatdan keçmiş cəmi 133 özəl bağça və ya özəl bağça kompleksi var. Onların da təbii ki, hər birinin çoxsaylı filalı yoxdur. Bizdə özəl bağçalarla bağlı stimullaşdırıcı addımların atılması hava-su kimi vacib məsələdir. Çünki özəl bağçalar kiçik sahibkarlıq müəssisələri kimi daha kompakt şəkildə fəaliyyət göstərə bilərlər. Eləcə də icma əsaslı və modul tipli bağça formatlarının da fəaliyyəti başladılmalıdır. Bizdə təəssüf ki, bu iki metod demək olar ki, işlək deyil. Yəni, sayı onsuz da çox olmayan bağçalarda nəzarət mexanizmini tətbiq etmək o qədər də çətin deyil. Yetər ki, müəssisəninm rəhbər, tərbiyəçi və metodist heyəti özü işinin öhdəsindən lazımınca gələ bilsin".

Vüsalə İbrahimli

Telegramda izləyin