"Zəngəzur dəhlizinin açılması ölkəmizi Şərq və Qərbin mühüm iqtisadi tərəfdaşına çevirəcək" - Günay Ağamalı ilə MÜSAHİBƏ

Milli Məclisin deputatı, Ana Vətən Partiyasının sədr müavini Günay Ağamalı Sonxeber.az-ın suallarını cavablandırıb.

- 44 günlük Vətən müharibəsində və 1 günlük anti-terror əməliyyatları zamanı ərazi bütövlüyümüz, suverenliyimiz tam bərpa olundu. Bu gün məcburi köçkünlərimiz mərhələli şəkildə öz doğma yurdlarına geri qayıdır. Bu gün qarşıya qoyulan hədəflər Zəngəzur dəhlizinin aşılması və qərbi azərbaycanlılarında öz torpaqlarına geri qayıtmasıdır. Qərbi azərbaycanlılar öz torpaqlarına geri qayıdana qədər 2005-ci ildə ləğv edilən qaçqınlıq statusu yenidən bərpa oluna bilərmi?

- Biz 44 Günlük Vətən Müharibəsində və antiterror əməliyyatı zamanı ölkəmizin gücünü və qüdrətini bütün dünyaya nümayiş etdirdik. Bu gün Azərbaycan Cənubi Qafqazda söz sahibidir. Bütün təhdidlərə, qərəzli münasibətlərə baxmayaraq yenilməzliyimizi ortaya qoyduq. Zəngəzur dəhlizinin açılması ölkəmizi Şərq və Qərbin mühüm iqtisadi tərəfdaşına çevirirməklə yanaşı, həm də Azərbaycanın ayrılmaz tərkib hissəsi olan Naxçıvan Muxtar Respublikasını nəqliyyat-kommunikasiya blokadasından çıxaracaq. Qaçqınlıq statusu məsələsi qanunvericiliklə tənzimlənən məsələdir.

- Günay xanım, illər boyu düşmənçilik şəraitində yaşamış iki xalqın birgə yaşayışı ilə bağlı müəyyən problemlər çıxa bilər, bu, aydındır. Bu proses necə tənzimlənməlidir?

- Əlbətdə ki, əsrlər boyu bizimlə düşmənçilik ənənəsini davam etdirən ermənilərlə birgə yaşamağımıza ilk öncə psixoloji hazırlıq olmalıdır. Bu sadə məsələ deyil. Azərbaycan Respublikasının ərazisində yaşayan hər bir kəs onun qanunlarına və konstitusiyayasına tabe olmalıdır.

- Bu gün təklif olunan məsələlərdən biri də qərbi azərbaycanlıların Xankəndinə köçürülməsidir. Sizin bu barədə düşüncələriniz bizim üçün çox maraqlıdır.

- Təbii ki, hər bir Azərbaycanlının Xankəndidə yaşamaq istəyi qəbul ediləndir, o cümlədən də Qərbi Azərbaycanlıların. Lakin zənnimcə Qərbi Azərbaycanlıların öz dədə-baba yurduna dönmələri daha məqsədəuyğundur. Qərbi Azərbaycana qayıdış dövlət siyasətinin prioritetlərindəndir. Buna görə də yurd həsrətinə son qoyulması üçün Cənab Prezidentimizin ətrafında sıx birləşməli, həmrəy olduğumuzu bir daha nümayiş etdirməliyik. Biz 30 il Qarabağ həsrəti ilə yaşadıq, hamımız Qarabağlı olduq və Qarabağı və Şərqi Zəngəzuru qaytardıq. Bu gün isə hər birimizin Qərbi Azərbaycanlı olmaq zamanıdır və bu ümummilli məsələdir.

- Qərbi azərbaycanlılara dəyən zərərə görə Ermənistana təzminat davası açılacaqmı?

-Son 200 ildə Qərbi Azərbaycanlılar erməni vəhşiliyinə məruz qalaraq dəfələrlə deportasiya olunub, pərən-pərən salınıblar. Rəsmi Ermənistan buna görə hüquqi məsuliyyət daşıyır və dəymiş ziyanın təzminatını ödəməlidir.

-Qərbi azərbaycanlılar başına açılan müsibətləri əks etdirən abidə və yaxud muzeyin açılmasına ehtiyac varmı?

- Vətən savaşından keçən qısa zaman kəsiyində paytaxtımızda Qənimətlər Parkı salındı. Bu parkın salınması düşmən üzərində Zəfərimizi özündə ehtiva edən müqəddəs ocağa çevrildi. Dediyim ki, qərbi Azərbaycanlılar əsrlər boyu ermənilərin deportasiyalarına məruz qalıb, min bir zülmlərlə qarşılaşıb. Zülm və deportasiyaları özündə əks etdirən abidə yaxud muzeyin açılması məqsədə uyğun olardı.

- Qərbi azərbaycanlılar doğma yurdlarına hansı ölkənin vətəndaşı kimi köçürüləcək? Azərbaycan və ya Ermənistan vətəndaşı kimi?

- Qərbi Azərbaycan Azərbaycanın tarixi və əzəli torpağıdır. Bu səbəbdən də hesab edirəm ki, soydaşlarımızın doğma yurdlarına qayıtması, elə Azərbaycan vətəndaşı kimi qəbul edilməlidir.

Telegramda izləyin