Ermənistan zəfərimizdən nəticə çıxarsa, daha yaxşı olar, nəinki... - AÇIQLAMA

Bu gün Müzəffər Ali Baş Komandan İlham Əliyevin liderliyi altında Azərbaycan ordusu 44 gün ərzində 30 ilə yaxın hərbi işğal və təcavüzə son qoyaraq Cənubi Qafqazın mirvarisi hesab edilən və baş tacımız olan Şuşada üçrəngli bayrağımızı dalğalandırmaqla növbəti möhtəşəm zəfərlərin balanğıcını qoyan qələbədən 4 il keçir.

Bunu Ölkə.Az-a açıqlamasında deputat Eyvaz Qurbanov deyib.

Deputat bildirib ki, 44 günlük müharibə nəticəsində Azərbaycan Ermənistanın işğalına son qoymaqla ərazi bütövlüyünü bərpa edərək, Cənubi Qafqaz bölgəsində tamamilə yeni reallıqlar və sülh üçün tarixi imkanlar yaratdı: "Şuşanın işğaldan azad edilərək, orada üçrəngli bayrağımızın dalğalanması növbəti qələbələrimizin əsasını qoydu. Düşmən işğal altında olan Ağdam, Kəlbəcər və Laçın kimi strateji ərazilərimizi müharibəsiz geri qaytardı. Bununla da Azərbaycanın ərazi bütövlüyü təmin edildi.

Azərbaycan Vətən müharibəsindən dərhal sonra bölgədə sülh təşəbbüsü ilə çıxış edərək, regional baxışı və yanaşmasının dayanıqlı sülh quruculuğuna əsaslandığını bəyan etdi.

Lakin Ermənistan tərəfinin üçtərəfli

bəyanatı kobud şəkildə pozaraq ərazilərimizdən işğalçı qüvvələri çıxarmaması, davam edən hərbi-siyasi təxribatları, təbii ehtiyatlarımızın qanunsuz istismarı, vətəndaşlarımızın həyat və sağlamlıqlarına hədə törədən mina təhdidini davam etdirməsi, işğal dövrünün qalıqları olan erməni silahlı birləşmələri və Ermənistanın ərazilərimizdə yaratdığı qondarma rejimə qarşı 2023-cü ilin sentyabrın 19-20-də Qarabağda antiterror tədbirlərinin həyata keçirilməsini labüd etdi. Əgər 2020-ci ildə 44 günülük Vətən müharibəsi nəticəsində Azərbaycan ərazi bütövlüyünü təmin etmişdisə, antiterror əməliyyatı nəticəsində suverenliyini tam bərpa etdi. 44 günlük Vətən müharibəsi və Qarabağ bölgəsində həyata keçirilən antiterror tədbirləri dayanıqlı sülh quruculuğu üçün tarixi şəraitin yaranması ilə nəticələndi.

Hazırda, çətin də olsa, Azərbaycanın təşəbbüsü ilə Ermənistanla sülh sazişi layihəsi üzrə aparılan ikitərəfli danışıqlarda vacib irəliləyişlər əldə olunub.

Azərbaycanın bölgədə dayanıqlı sülh, sabitlik və sıx əməkdşalıq istiqamətində yürütdüyü siyasətin uğurla yekunlaşmasının qarşısında hələ də bir çox çağırış və təhdidlər qalmaqdadır. Xüsusən də Ermənistanın Konstitusiyasında ölkəmizə qarşı davam edən ərazi iddiaları, habelə bu ölkəni yenidən hərbi təcavüzə sürükləyən tərəflərin mövcudluğu fonunda Ermənistanın hərbiləşməsi davamlı sülh üçün maneədir. Hesab edirəm ki, Ermənistan yaxın dövrün tarixindən dərs çıxararaq, qonşularına qarşı ərazi iddialarının sonunun olmadığını birdəfəlik anlamalıdır.

Ermənistan tərəfi bunu nə qədər tez anlasa yaxşı olacaq. Bununla da ermənilər tarix boyunca üzləşdikləri faciələrə son qoymaqla inkişaf mərhələsinə qədəm qoymuş olacaqlar".

Deputat onu da əlavə edib ki, Azərbaycan xalqı bundan sonra cənab Prezident İlham Əliyevin liderliyi altında bölgədə dayanıqlı sülhü bərpa etməklə, yeni-yeni uğurlara və qələbələrə imza ataraq dünyanın ən güclü ölkələrindən birinə çevriləcək.

Telegramda izləyin