"Parlament Görüşü müsbət nəticələr əldə etmək üçün əhəmiyyətli bir platformadı" - DEPUTAT

"Bakıda COP29 çərçivəsində Parlamentlərarası İttifaq və Azərbaycan Milli Məclisinin birgə təşkilatçılığı ilə keçirilən Parlament Görüşü, qlobal iqlim dəyişikliyi və dayanıqlı inkişaf mövzularında parlament üzvlərinin və dövlət nümayəndələrinin bir araya gəlməsi baxımından böyük əhəmiyyət kəsb edir. Bu cür görüşlər, iqlim dəyişikliyi ilə mübarizə, karbon emissiyalarının azaldılması və dünya miqyasında ekoloji siyasətlərin tətbiqi üzrə mühüm qərarların qəbul edilməsində parlamentlərin rolunu vurğulayır. Parlamentlərarası İttifaq və Azərbaycan Milli Məclisinin birgə təşkil etdiyi bu cür görüşlər, qlobal iqlim siyasətinin formalaşdırılması üçün parlamentlərin gücünü birləşdirməyə imkan verir. İqlim dəyişikliyi ilə bağlı mövcud qanunvericilik və təşəbbüslərin müzakirəsi, dünyadakı parlamentlərin ortaq yanaşmalarını müəyyən etməyə xidmət edir".

Bunu Sonxeber.az-a deputat Şahin Seyidzadə bildirib.

Deputat qeyd edib ki, parlamentlərarası görüşlər Iqlim dəyişikliyi və ətraf mühit sahələrdə parlament üzvlərinin məlumatlılığını artırmaq, iqlim siyasətləri və ətraf mühit məsələləri barədə onları maarifləndirmək üçün yaxşı bir platformadı:

"Bu görüşlər, iqlim dəyişikliklərinin qarşısının alınması məqsədilə qanunvericilik təşəbbüslərini müzakirə etmək və ölkələrdə karbon emissiyalarının nəzarət altına alınması üçün qanuni və institusional mexanizmlərin tətbiqinə dəstək olur. Parlamentlərin bu sahədə rolunun artması, dünya miqyasında daha effektiv iqlim siyasətlərinin həyata keçirilməsini təmin edir. Belə görüşlər, müxtəlif ölkələrin parlamentlərini bir araya gətirərək, müsbət təcrübə mübadiləsi və həmrəylik təşviq edir, beynəlxalq səviyyədə iqlim məsələləri üzrə multilateral yanaşmanı gücləndirir. Azərbaycan, qlobal iqlim dəyişikliyi məsələlərinə öz töhfəsini vermək istəyən bir ölkə olaraq, bu cür beynəlxalq toplantılarda həm öz təcrübəsini paylaşır, həm də digər ölkələrlə əməkdaşlığı artırır. Parlamentlərarası İttifaqla birgə təşkil edilən bu cür tədbirlər, Azərbaycan üçün həm beynəlxalq nüfuzunu artırmaq, həm də iqlim siyasətindəki səylərini gücləndirmək baxımından əhəmiyyətlidir".

Deputat vurğulayıb ki, parlamentlərarası görüşlər, qanunverici orqanların birbaşa iqlim siyasətləri üzərində təsir göstərməsini asanlaşdırır:

"Bu platformada müzakirə edilən məsələlər, gələcəkdə dövlətlərin və beynəlxalq təşkilatların verdiyi qərarlara təsir göstərə bilər. Bu cür toplantılar, iqlim dəyişikliklərinə qarşı mübarizədə dövlətlər və parlamentlər arasında əməkdaşlıq və həmrəylik yaratmağa, həmçinin qlobal miqyasda davamlı inkişafın təmin edilməsi istiqamətində atılacaq addımlara əhəmiyyətli təsir göstərir. Beləliklə, Parlament Görüşü nəticə etibaı ilə yalnız iqlim dəyişikliyinin qarşısını almaqla bağlı təkliflər və hüquqi çərçivələr üzərində deyil, həm də siyasi iradə və beynəlxalq əməkdaşlıq əsasında müsbət nəticələr əldə etmək üçün əhəmiyyətli bir platformadır".

Telegramda izləyin