"Fransanın COP29-a qatılmaqdan imtinası onun qlobal məsələlərdə qeyri-səmimi mövqeyini, ikili standartlarını bir daha üzə çıxardı" - DEPUTAT

"Fransanın COP29-a qatılmaması ciddi ziddiyyət yaratdı.Prezident İlham Əliyev COP29 Liderlər Sammitində çıxışı zamanı Fransanın əsrlər boyu davam edən qərəzli siyasətini sərt tənqid etdi".

Bunu Sonxeber.az-a danışan deputat Şahin Seyidzadə bildirib.

Deputat qeyd edib ki, Əlcəzairdən Yeni Kaledoniyaya qədər Fransanın həyata keçirdiyi siyasət insan hüquqlarını pozan, xalqları təbii sərvətlərindən məhrum edən və etirazları zorakılıqla boğan bir sistemin izlərini daşıyır:

"Fransa hökumətinin COP29-a qatılmaması bir növ bu ittihamlara cavab verməkdən, öz keçmişi ilə üzləşməkdən qorxduğunu göstərir. Fransa bir daha inkişaf etməkdə olan ölkələrə ədalətsiz siyasət yürütdüyünü nümayiş etdirdi. Fransanın bu addımı bir daha Qərbin özünü "demokratiya və insan hüquqlarının müdafiəçisi" kimi təqdim etdiyi zaman nə qədər riyakar olduğunu göstərir. Eyni zamanda bu qərar Avropanın öz daxilində olan ikili standartların və qlobal problemlər qarşısında qeyri-səmimi mövqeyinin bariz nümunəsidir.

 Prezident İlham Əliyevin sammitdə səsləndirdiyi fikirlər Fransa kimi dövlətlərin ikili standartlarını ifşa etdi. Azərbaycanın bu təşəbbüsü təkcə regional deyil, qlobal iqlim problemlərinin həlli üçün də mühüm töhfədir. Fransanın COP29-a qatılmaqdan imtinası onun qlobal məsələlərdə qeyri-səmimi mövqeyini, ikili standartlarını bir daha üzə çıxardı". 

Deputat vurğulayıb ki, dünyanı ən çox çirkləndirən ölkələr istixana qazı emissiyaları ilə iqlim dəyişikliyinə ən çox səbəb olan ölkələrdir:

"Sənayeləri inkişaf etmiş ölkələr kimi önə çıxan bu dövlətlərin bəzisi bu gün Azərbaycanda təşkil edilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) qatılmamağı seçib. Fransanın COP29-a qatılmaması tarixi və müasir ətraf mühit məsuliyyətləri baxımından ciddi ziddiyyət yaradır. Bir tərəfdən Paris Sazişinə ev sahibliyi edərək iqlim problemləri ilə mübarizədə liderlik iddiası ortaya qoyan Fransa, digər tərəfdən keçmişdə həyata keçirdiyi nüvə sınaqları və dənizaşırı (DOM-TOM) bölgələrdə apardığı neokolonyal fəaliyyətlərin yaratdığı ətraf mühit çirklənməsi faktı ilə üzləşməkdən qaçır.

Fransanın Afrikada və digər keçmiş müstəmləkələrində davam etdirməyə çalışdığı iqtisadi hegemoniyasının iqlim ədaləti ilə açıq ziddiyyət təşkil edir, eyni zaman qlobal Cənub iqlim dəyişikliyindən ən çox təsirlənən tərəfdir. Bu yükün böyük hissəsi isə tarixən emissiya məsuliyyəti daşıyan Fransa kimi ölkələrə aiddir. COP29 kimi platformalara qatılmayaraq həm bu həqiqətlərdən qaçmaq, həm də iqtisadi və siyasi hesablarla məsuliyyətlərindən yayınmaq cəhdi Fransanın beynəlxalq iqlim mübarizəsindəki nüfuzuna zərbə vurur. Fransanın bu mövqeyi beynəlxalq cəmiyyətdə ona qarşı ciddi etimad itkisinin yaranmasına səbəb olacaq. Belə ki, qlobal iqlim dəyişikliyi bütün bəşəriyyətin diqqət mərkəzində olan ən mühüm, hətta təhlükəsizlik baxımından ən vacib məsələdir

Azərbaycanın belə bir toplantıya ev sahibliyi etməsi olduqca mühüm hadisədir. BMT-nin Baş Assambleyasına üzv dövlətlərin yarısından çoxu bu tədbirdə təmsil olunur. Bu cür genişmiqyaslı tədbirin öhdəsindən uğurla gəlməsi isə Azərbaycanın qlobal məsələlərin həllində artan rolunu və beynəlxalq problemlərə töhfə vermək həssaslığını nümayiş etdirir. Azərbaycan bununla həm qlobal səviyyədə iqlim dəyişikliyi ilə mübarizədə həmrəyliyə inamını ifadə edir, həm də regional və qlobal səviyyədə ətraf mühit siyasətinin gücləndirilməsinə, inkişafına imkan yaradır. Təbii ki, burada Türk Dövlətləri Təşkilatının (TDT) mühüm ölkələrindən olan Azərbaycanın COP29 kimi irimiqyaslı tədbirə ev sahibliyi etməsinin təşkilat üçün də əhəmiyyətini vurğulamaq lazımdır". 

Telegramda izləyin