"Bakı COP29-un iqlim maliyyələşməsi və gələcək fəaliyyət planı ilə bağlı üzərinə düşən missiyanı uğurla yerinə yetirdi" - Bəhruz Quliyev

"COP29-un Azərbaycanda keçirilməsi böyük etimaddır və əldə edlən uğurlar isə göstərilən etimadın məntiqi nəticəsidir. Prezidentimiz İlham Əliyevin dediyi kimi, COP29-a ev sahibliyi edəcək ölkə kimi yekdil qərarla seçilmək bizim üçün həqiqətən böyük şərəfdir. Beynəlxalq tədbirin Bakıda sayca 29-cu tədbiri bir çox özəllikləri ilə yadda qaldı. Əvvəla, ilk dəfə olaraq "Troyka" qrupu yaradıldı ki, bu da əldə edilən qərarların, gəlinən nəticələrin növbəti COP tədbirində davamlılığını, ardıcıllığını təmin edəcək. İkincisi, COP29-da ilk dəfə olaraq dünyanın inkişaf etməkdə olan ölkələrində ekoloji problemlərin həlli, yaşıl enerjiyə keçid, alternativ enerji mənbələrinə çıxışın təmin edilməsi üçün nəzərdə tutulan büdcənin maksimum həddə çatdırılması mümkün oldu. Bəli bu, evsahibi olaraq Bakını gördüyü işlər sayəsində mümkün oldu".

Bunu Sonxeber.az-a açıqlamasında SƏS Media Qrupun rəhbəri, siyasi analitik Bəhruz Quliyev deyib.

Siyasi analitik qeyd edib ki, "Yaşıl dünya naminə həmrəylik" şüarını rəhbər tutan Azərbaycan müzakirə və danışıqların qərəzsiz aparılması üçün bütün imkanları yaratdı:

"Azərbaycan inkişaf etməkdə olan ölkələrin ehtiyaclarını nəzərə alaraq nəticə əldə etməyə hesablanmış addımlar atdı, həmin ölkələrin təhlükələrlə üzləşdiyini və bunun hər keçən gün daha da şiddətli xarakter aldığını bütün tədbir boyu çıxışlarda müzakirə edilməsinə çalışdı və istəyinə nail oldu. Müstəmləkə idarəçiliyinin yaratdığı problemlər də diqqətdən qaçmadı, dənizaşırı ada dövlətləri ilə həmrəylik nümayiş etdirdi. O da xüsusi olaraq qeyd edildi ki, bəşəriyyət iqlim dəyişmələri, təbiətin məhvi, havanın, suyun və torpağın həddindən çox çirkləndirilrməsindən yaranan ekoloji fəlakət mərhələsindədir.

Dünya ölkələri bunun qarşısını almasa, "yaşıl enerji"yə keçidi təmin etməsə daha acınacaqlı vəziyyət yarana bilər. Azərbaycanın yaratdığı unikal şərait Tərəflər Konfransının 29-cu sessiyasında gələcək addımların, yeni hədəf və mexanizmlərin müəyyənləşdirilməsində bökyük rol oynadı və nəticədə gözlənilən qərarlar qəbul edildi. Belə ki, COP29-da İtki və Zərər Fondu tam işlək vəziyyətə gətirildi, 1,3 trilyon ABŞ dolları yeni iqlim maliyyəsi hədəfi seçildi, bir çox insanlar Azərbaycanın buna nail ola biləcəyinə şübhə edir, hamının razılaşa biləcəyinə şübhə ilə yanaşırdılar. Onlar hər iki məsələdə yanıldılar. Beləliklə, rəsmi Bakı COP29-un iqlim maliyyələşməsi və gələcək fəaliyyət planı ilə bağlı bütün tərəflərdə aydın təsəvvür yaratdı, üzərinə düşən missiyanı çox yüksək səviyyədə yerinə yetirdi".

Telegramda izləyin