Bakı Metrosunda baş verən tüstülənmənin səbəbi bilindi

Ötən gecə metronun "Elmlər Akademiyası" stansiyasında qatarlardan birində tüstülənmə qeydə alınıb.

Bu barədə məlumat BAKU.WS-in "qaynar xətti"nə daxil olub.

Bildirilib ki, nəticədə təşvişə düşən sərnişinlər vaqonları tərk ediblər.

Məsələ ilə bağlı "Bakı Metropoliteni" Qapalı Səhmdar Cəmiyyətinin Mətbuat xidmətinin rəhbəri Bəxtiyar Məmmədov BAKU.WS-in sorğusuna cavab olaraq bildirib ki, bu, xüsusi təşvişdoğuracaq hadisə deyil. Hər şey qaydasında olsa da əlavə yoxlanış keçirilib və daha sonra qatar yoluna davam edib.

"Kondisionerin təmizləyici qurğusundan qoxu və tüstü olub. Bu kondisionerin özünü tənzimləmə sistemidir. Dərhal sovurma ventilyatoru işə düşüb. Maşinistin idarəetmə panelinə məlumat daxil olan kimi dediyiniz stansiyada sərnişinlər düşürülüb, yoxlama aparılıb. Problem olmayıb. Qatar növbəti stansiyadan sərnişinlə yoluna davam edib. Belə halda sərnişinlə və ya sərnişinsiz yola davam etmək maşinistin qərarı ilə olur. Maşinist məlumatı verdikdən sonra sərnişinlərin də əlavə narahatlıq keçirməməsi məqsədilə atılmış addımdır", - deyə B. Məmmədov qeyd edib.

Telegramda izləyin