"Ermənistanın müxtəlif bəhanələr gətirməklə Rusiyaya nota verməsi iki ölkənin kəskinləşən münasibətlərinin növbəti təzahürüdür" – AÇIQLAMA

Yanvarın 15-də Rusiyanın Ermənistandakı səfiri Sergey Kopırkin Ermənistan XİN-ə çağırılıb.

Bu barədə Ermənistan XİN-in mətbuat xidməti məlumat yayıb.

Bildirilib ki, buna səbəb cari il yanvarın 12-də Rusiyanın Ümumrusiya Dövlət Televiziya kanalında yayımlanan "Vesti nedeli" proqramında "Ermənistanın suverenliyi və ərazi bütövlüyünə qarşı süni şəkildə yaradılan narrativlər" olub.

"Görüş zamanı səfirə müvafiq etiraz notası təqdim edilib", - deyə məlumatda vurğulanıb.

Bəs görəsən Ermənistan və Rusiyanın bundan sonrakı münasibətləri necə olacaq?

Mövzu ilə bağlı politoloq Tural İsmayılov Sonxeber.az – a açıqlama verib:

"Faktiki olaraq Ermənistanda Nikol Paşinyanın sorosçu hakimiyyətinin iqtidara gəlməsindən sonra Ermənistan və Rusiya arasındakı münasibətlərdə çatların yaranacağı məlum idi. Nəzərə almaq lazımdır ki, bu gün bu iki ölkənin münasibətləri kifayət qədər gərgindir. Bunun bir çox səbəbləri var. Rusiya görür ki, Paşinyan sistematik şəkildə qərb agentura şəbəkələrini öz ərazilərinə dəvət edərək Cənubi Qafqazda qərbin pionu olmaq yolunda addımlayır. Əvvəlcə Avropa İttifaqının Mülki Müşahidə Missiyası adı altında qərb casus şəbəkələrini Ermənistan ərazilərinə doldurmaqla məşğul oldu. Bu gün isə görürük ki, daha ciddi və təhlükəli addımlar atılır. Amerika ilə dırnaqarası strateji müttəfiqlik haqqında xartiyanın imzalanması Ermənistanın bir başa regiona kənar oyunçuları daha çox cəlb etməsi və Rusiya əleyhinə atdığı demanş idi. Bu baxımdan da, bu gün Ermənistanın müxtəlif bəhanələr gətirməklə Rusiyaya nota verməsi iki ölkənin kəskinləşən münasibətlərinin növbəti təzahürüdür. Bu gün Ermənistan elə bir siyasi gücə malik deyil ki, Rusiya ilə müharibə apara bilsin. Onlar nə qədər anti-Rusiya propoqandasını dövlət siyasətində əsas hədəf halına gətirsələr də, bu gün Ermənistan Rusiyanın asılılığından xilas ola bilmir. Amma istənilən halda bu gün Lavrovun və Rusiya rəsmilərinin Ermənistan əleyhinə verdikləri bəyyənatlar, həmçinin Ermənistanın qarşı tərəfə verdiyi nota iki ölkənin münasibətlərində çox çətin dövrün başladığını göstərir".

Çiçək Sadatova

Telegramda izləyin