Şagirdlərə intihara sürükləyən oyunun loqosu olan KAĞIZ PAYLANILIB: DİN-dən XƏBƏRDARLIQ

"İki azyaşlı tərəfindən onlayn oyuna çoxsaylı oyunçu təşviq etmək üçün vərəqələr 25 məktəbliyə verilib. Polis əməkdaşları tərəfindən bütün xüsuslar tam və hərtərəfli araşdırılıb və yoxlanılıb. İş üzrə əməldə ictimai təhlükəli hal aşkar olunmayıb, kriminal tərkib yoxdur".

Bu barədə Sonxeber.az-a Daxili İşlər Nazirliyinin (DİN) Mətbuat Xidmətinin rəisi polis polkovnik-leytenantı Elşad Hacıyev məlumat verib.

E.Hacıyev vurğulayıb ki, valideynlərə tövsiyə edirik, övladlarının internetdə maraqlandıqları şəbəkə oyunlarına diqqətlə yanaşsınlar, onların hansısa ictimai təhlükəli əməllərə sövq edilmə riski var:

"Valideynlər bilməlidirlər ki, internet təkcə faydalı informasiya aləti deyil, həm də kibertəhlükə, risk və təhdidlərin mövcud olduğu qlobal məkandır. İnternet resurslarında istənilən yalanın həqiqət formasında təbliğatı azyaşlıları naməlum şifrəli, təhlükəli "əmr"lərin icraçısına çevirməsi ehtimalı var. Heç bir valideyn düşünməsin ki, "mənim övladım bunu etməz". Uşaqlara nəzarət dövrün əsas qaydası yox, tələbidir. Bu, təkcə məktəbin, müəllimin işi yox, cəmiyyətin hər bir üzvünün qayğısı və məsuliyyəti olmalıdır".

E.Hacıyev əlavə edib ki, DİN tərəfindən respublikanın ali və orta təhsil məktəblərində tələbələrin, şagirdlərin zərərli vərdişlərdən çəkindirilməsi, təhsilə təşviq edilməsi istiqamətində kompleks iş aparılır. Heç bir çağırışa polis tərəfindən etinasız yanaşılmır.

10:28

Bakı şəhəri 210 nömrəli tam orta məktəbdə oxuyan şagirdə üzərində bir oyunun loqosu əks olunan və mobil nömrə yazılan kağızlar verildiyi ilə bağlı vətəndaş sosial media hesabında paylaşım etmişdi.

Vətəndaş bildirib ki, bu oyunu araşdıranda dünyada geniş yayıldığını və uşaqları intihara təşviq etdiyini öyrənib.

Məsələ ilə bağlı məktəbdən Oxu.Az-a bildirilib ki, məktəbdaxili araşdırma aparılır:

"Məsələ ilə bağlı məktəbdaxili araşdırma aparılır. Valideyn məktəbə dəvət olunub, şagird və valideynlərlə müvafiq söhbət aparılır, məktəb psixoloqu tərəfindən şagirdlərlə bağlı dəstəkləyici tədbirlər görülür".

Telegramda izləyin