"Azərbaycan Çinlə münasibətlərini davamlı olaraq inkişaf etdirməyə böyük önəm verir" - DEPUTAT

"Prezident cənab İlham Əliyev Davosda Çinin CGTN telekanalına verdiyi müsahibədə Azərbaycan həqiqətlərini bir daha dünyaya çatdırdı, eyni zamanda bir çox regional və beynəlxalq təşkilatlar çərçivəsində, o cümlədən Şanxay Əməkdaşlıq Təşkilatı çərçivəsində və ikitərəfli formatda Azərbaycan Respublikası ilə Çin Xalq Respublikası arasında inkişaf edən münasibətlər haqqında geniş məlumat verdi".

Bunu Sonxeber.az-a danışan Milli Məclisin deputatı Vasif Qafarov bildirib.

Deputat bildirib ki, dövlət başçısı Azərbaycan ərazilərinin 30 ilə yaxın Ermənistanın işğalı altında qaldığını, bu müddət ərazində beynəlxalq hüququn norma və prinsiplərinin işləmədiyini, nəhayət Azərbaycanın beynəlxalq hüquqa əsaslanaraq, BMT Nizamnaməsinə və BMT Təhlükəsizlik Şurasının qətnamələrinə uyğun olaraq özünün ərazi bütövlüyünü və suverenliyini öz gücü ilə bərpa edib bölgədə ədaləti və sülhü təmin etdiyini bəyan etdi:

"Məlumdur ki, Çin böyük dövlətdir, böyük əhali sayına və böyük iqtisadiyyata malik bir dövlətdir. Həmçinin, Çin BMT Təhlükəsizlik Şurasının beş daimi üzvündən biridir. Bu mənada, Azərbaycan həqiqətlərinin Çin ictimaiyyətinə çatdırılması önəmlidir. Azərbaycan Respublikası ilə Çin Xalq Respublikası arasında münasibətlər möhkəm siyasi zəmin və beynəlxalq hüququn hamılıqla qəbul edilmiş norma və prinsiplərinə hörmət üzərində qurulub. Hər iki ölkə beyləlxalq arenada ikili standartlara əsaslanan siyasətə qarşı vahid mövqe nümayiş etdirir və beynəlxalq hüququn aliliyinin təmin edilməsi mövqeyindən çıxış edirlər. Çin Xalq Respublikası Azərbaycan Respublikasının ərazi bütövlüyünü və suverenliyi hər zaman dəstəkləyib. Azərbaycan da Tayvanın müstəqilliyini tanımır və "Vahid Çin" siyatətini dəstəkləyir.

Azərbaycan Çinlə münasibətlərini davamlı olaraq inkişaf etdirməyə və iki ölkə arasında tərəfdaşlığın genişləndirilməsinə böyük önəm verir. 2024-cü ildə Azərbaycan və Çin strateji tərəfdaşlıq haqqında Bəyannamə qəbul etdilər və bununla da iki ölkə arasındakı münasibətlər keyfiyyətcə yeni mərhələyə, strateji tərəfdaşlıq mərhələsinə qədəm qoydu".

Deputat vurğulayıb ki, Azərbaycan şaxələnmiş xarici siyasət aparır:

"Bu günə qədər Azərbaycan ümumilikdə 22 dövlətlə, o cümlədən Avropa İttifaqının üzvü olan 10 dövlətlə strateji tərəfdaşlıq bəyannaməsi, Türkiyə, Özbəkistan və Rusiya ilə isə müttəfiqlik bəyannaməsi imzalayıb. Dövlət başçısının sözləri ilə desək, şaxələnmiş bu xarici siyasət istiqaməti, sadəcə, siyasətə deyil, mahiyyətə əsaslanır. Hər bir sahədə əməli nəticələrimiz, əməkdaşlıq proqramlarımız var. Strateji tərəfdaşlar olan Azərbaycan və Çin arasında əlaqələr dinamik olaraq genişlənir. Azərbaycanla Çin arasında strateji tərəfdaşlıq hər iki ölkənin maraqlarına xidmət edir. Azərbaycanın Çinin aparıcı rol oynadığı Şanxay Əməkdaşlıq Təşkilatı ilə çox yaxşı və dost münasibətləri var. Azərbaycanın Şanxay Əməkdaşlıq Təşkilatında statusu müşahidəçi deyil, dialoq üzrə tərəfdaşdır. Çin ilə Avropa arasında Orta Dəhlizdə Azərbaycan mühüm yer tutur. Artıq Orta Dəhlizin Azərbaycan seqmentinin infrastrukturu təkmilləşdirilib. Qarşıdakı illərdə bu yolla 25 milyon ton yükün daşınması gözlənilir.

Həmçinin, Azərbaycan, Qazaxıstan və Özbəkistan arasında Xəzər dənizinin dibi ilə enerji kabelinin çəkilməsi barədə imzalanan müqavilə Mərkəzi Asiya ilə Azərbaycanı və potensial olaraq Çini enerji kabeli ilə bir-biri ilə bağlayacaq. Digər bir layihə ilə belə bir kabel xətti Qara dənizin dibi ilə Azərbaycandan Avropaya uzanacaq. Orta Dəhliz boyu yaşıl enerji üçün dəhliz olan bu layihə növbəti bir bağlantı layihəsidir və onun nəhəng potensialı var. Bütün bunlar, Orta Dəhliz boyu yerləşən ölkələr, o cümlədən Azərbaycan və Çin arasında qarşılıqlı maraq və mənafelərin təmin edilməsi yolunda yeni əməkdaşlıq imkanları açır".

Telegramda izləyin