"Əminəm ki, soydaşlarımıza qarşı müxtəlif cinayətlər törədənlərin hər birinin qanunla cəzalandırılmasının şahidi olacağıq" - DEPUTAT

"Ermənistanın ölkəmizə qarşı apardığı soyqırım siyasətində, sülh və insanlıq əleyhinə törədilən cinayətlərdə, torpaqlarımızın işğalı, terror aktları və terrorçuların maliyyələşdirilməsində, zorla hakimiyyətin ələ keçirmək və saxlanılması kimi cinayətlərin törədilməsində iştirak edən şəxslərin məhkəməsi davam edir. Bu şəxslər Ermənistanda rəsmi vətəndaşlığı olan, 30 il ərzində torpaqlarımızın işğal altında saxlanılmasında, həmçinin, Vətən müharibəsi bitdikdən sonra da separatizmi dəstəkləyən və bütün aspektlər üzrə onu gücləndirən fəaliyyətlər göstəriblər".

Bunu Sonxeber.az-a danışan Milli Məclisin üzvü Azər Allahverənov bildirib.
Deputat qeyd edib ki, əldə olunan faktlara və hüquq mühafizə orqanlarımızın əlində olan sübutlara nəzər saldıqda bu şəxslərin sadalanan cinayətlərdə iştirak etməsinə dair hər hansı şübhələr üçün yer qalmır:
"Məhkəmə prosesi zamanı qeyd edilən cinayətlər barədə faktlar səsləndirilir və onlarə təsdiqləyən ciddi sübutlar göstərilir. Təbii ki, hətta belə bir şəraitdə təqsiri şübhə olunan bu şəxslər müxtəlif aldadıcı ifadələri ilə törətdikləri cinayətlərdən boyun qaçırmağa, məhkəmə prosesini izləyən ictiamiyyəti çadırmağa çalışırlar. Məhkəmə prosesini daha da çətinə salmaq, onu mürəkkəbləşdirmək üçün ittiham olunanlar müxtəlif manipulyasiyalara da əl atırlar.
Amma məhkəmə prosesi qanunun aliliyi təmin olunmaq şərtilə çox şəffaf, açıq və ədalətli aparılır. Məhkəmə iclaslarında təqsirləndirilən şəxslər, onların müdafiəçiləri ilə yanaşı həm də zərərçəkmişlərin bir qismi, onların varisləri və nümayəndələri də iştirak edirlər. Məhkəmədə iştirak edən prokurorlar əsaslı faktlara və sübutlara söykənən ittihamlar səsləndirirlər. Müxtəlif dövrlərdə qondarma rejimin rəhbərliyində təmsil olunan bu şəxslər törətdikləri cinayətlərdən yayınmağa çalışsalar da məqsədlərinə çata bilməyəcəklər. Çünki onlar de-yure Ermənistanın vətəndaşı olaraq qonşu ölkənin ərazisinin işğal olunmasında, onun təbii sərvətlərinin istismar edilməsində, mədəni və tarixi abidələrinin dağıdılmasında, əhalisinə qarşı müxtəlif vəhşilik və soyqırım törədilməsində iştirak etməkdə günahkar bilinirlər. Və faktlardan isə onlara yayına bilməyəcəklər".
Deputat vurğulayıb ki, maraqlı məsələlərdən biri də odur ki, məhkəmədə ifadə verənlər bütün cinayətlərin törədilməsində həm də Ermənistan silahlı qüvvələrinin iştirak etdiyini bildirirlər:
"İstər 44 günlük Vətən müharibəsində, istərsə də ona qədər ki dövrdə. Hətta bunu onunla əlaqələndirməyə çalışırlar ki, Dağlıq Qarabağda yaşayan vətəndaşların çox az idi və onlar müdafiəni təşkil edə bilməzdi. Təqsirləndirlilən şəxslər törətdikləri cinayətlərdən yayınmağa və nə qədər manipulyasiyalara əl atmağa çalışsalar da başqa dövlətin vətəndaşı olmaqla Ermənistan tərəfindən ölkəmizə qarşı aparılmiş işğalçılıq siyasətində birbaşa iştirak etdiklərini inkar edə bilməzlər. İşğal dönəmində onların dinc əhaliyə qarşı misli görünməmiş vəhşiliklər və cinayətlərin törədilməsində iştirak etməkləri ilə bağlı əsaslı şübhələr var. Amma istənilən halda məhkəmənin qətnaməsi çıxarılana qədər onlar sadaladığım cinayətlərin törədilməsində şübhəli olan şəxslər qismində çıxış edirlər.
Onların bu tipli fəaliyyətləri olması ilə bağlı fikirlər və faktlar hətta Ermənistanın araşdırmaçıları, jurnalistləri tərəfindən zaman-zaman dilə gətirilib. Təbii ki, bütün bunlar da sübut kimi istifadə olunacaq materiallardır. Eləcə də Serj Sarkisyanın, Robert Köçəryanın müsahibələrində Xocalının və digər Azərbaycanın digər şəhər, qəsəbə və kəndlərinin işğalı zamanı törətdikləri soyqırım və digər cinayətlərdə iştirak etmələrini təsdiq edən ifadələri var. Düşünürəm ki, məhkəmə prosesi çox ədalətli, obyektiv insan hüquqlarının bütün təməl prinsipləri söykənən formada davam etdirilir. Çıxarılan məhkəmə qətnamələri də bu prinsiplərə söykənən formada olacaq. Əminəm ki, soydaşlarımızın haqlarını və hüquqlarını tapdalayan, onlara qarşı müxtəlif vəhşiliklər törədən şəxslərin tez bir zamanda qanunla cəzalandırılmasının şahidi olacağıq və inanıram ki, məhkəmə qarşısına bu gün çıxarılmayan digər şübhəli şəxslər də tezliklə qanunla öz cəzalarını alacaqlar".

Telegramda izləyin