Peyğəmbərlik yuxuları həqiqətən gələcək hadisələrdən xəbər verirmi? - Rusiyalı həkimdən AÇIQLAMA

Martın 18-də bütün dünyada qeyri-rəsmi olaraq "Reallaşan Yuxular Günü" ("Peyğəmbərlik Yuxuları Günü") kimi qeyd olunur.

Oxu.Az-ın xəbərinə görə, rusiyalı yuxu həkimi Mixail Poluektov "İzvestiya" nəşrinə müsahibəsində peyğəmbərlik yuxularının həqiqi olub-olmadığından danışıb.

İnsanlar yuxunun sürətli fazasında yuxular görürlər ki, bu da onların ümumi istirahət vaxtının təxminən 25%-ni təşkil edir. Mütəxəssisin sözlərinə görə, əksər hallarda peyğəmbərlik yuxuları özünüaldatma və ya yuxuda görülən bəzi detalların sonradan reallıqda baş verən hadisələrlə üst-üstə düşməsi ilə əlaqədardır.

Həkim bildirib ki, yuxular xatirələrdən və müxtəlif yaddaş dəyişənlərindən əmələ gəlir. Yuxularda insan başına gəlməyən və daha əvvəl qarşılaşmadığı heç bir şeyi görə bilməz.

"Oyaq vəziyyətdə insan daim öz düşüncələrində gələcəyin mənzərəsini xəyal edir - bu, beynin adi işidir. Bu, hər hansı hadisələri qabaqcadan görməyə və gələcəkdə arzuolunmaz vəziyyətlərdən qaçmağa imkan verir. Hissiyyat orqanlarından gələn yeni məlumatlar sayəsində gələcəyin bu mənzərəsi - hələ baş verməmiş hadisələrin proqnozu daim dəyişir, dəqiqləşir. Xəyallar yalnız xatirələrdən ibarətdir", - deyə Mixail Poluektov bildirib.

Lakin mütəxəssisin sözlərinə görə, bəzi hallarda yuxuların nəticəsi kimi hadisələrin olması mümkündür. Bu cür yuxular o zaman ortaya çıxır ki, hansısa hadisələrin xatirələri əsasında beyin hətta yuxuda da gələcəyin mənzərəsini qurmağa davam edir, və müəyyən bir məqamda bu yuxular əslində baş verəcək hadisələrlə üst-üstə düşə bilər.

"Böyük rusiyalı fizioloq İvan Mixayloviç Seçenov hələ 19-cu əsrdə demişdi ki, yuxular "keçmiş təəssüratların misli görünməmiş kombinasiyasıdır". Yuxuların görünən bütün yenilikləri yalnız yaddaşdan çıxan kombinasiyaların qəribəliyindən qaynaqlanır", - deyə Poluektov əlavə edib.

Telegramda izləyin