"Game of Thrones"un müəllifi 12 min il əvvəl ölən və yenidən dirildilən qədim canavarlarla birlikdə

"Taxt-tac oyunları"nın ("Game of Thrones") müəllifi, yazıçı Corc R.R.Martin 12 min il əvvəl yaşamış qədim canavarın ("direwolf"un) "yenidən dirildilmiş" növü ilə tanış olub.

Oxu.Az-ın "İzvestiya"ya istinadən məlumatına görə, bu barədə o, özünün sosial şəbəkə hesabında xəbər verib.

Yazıçının sözlərinə görə, onları ilk dəfə fevralda görüb, lakin bunu gizli saxlayıb.

"Mən və Romul. Ya bəlkə də Rem. Onlar əkizdirlər və bir-birindən ayırmaq çətindir", - deyə yazıçı şəkli şərh edib.

Xatırladaq ki, ABŞ-nin "Colossal Biosciences" biotexnologiya şirkəti "Taxt-tac oyunları" fantastik serialı ilə məşhurlaşan, lakin 12 000 ildən çoxdur ki, Yer üzündə rast gəlinməyən nəhəng qədim canavarın genlərini özündə daşıyan üç fərd "yaradıb".

Şirkət bunu nəsli kəsilmiş heyvanların dirildilməsi üzrə inqilabi missiyasında yeni bir irəliləyiş adlandırıb. Qeyd olunur ki, doğulan balalara əfsanəvi dişi canavarın böyütdüyü Roma qurucularının şərəfinə Romul və Rem, dişiyə isə "Taxt-tac oyunları" serialının personajının şərəfinə Xalisi adı verilib.

Küçüklərin çəkisi hazırda bu yırtıcılara ən yaxın qohumluğu olan boz canavarların eyni yaşdakı nümayəndələrinin çəkisindən 20-25% çoxdur. Onlar böyüdükdə təxminən 63.5 kq çəkiyə malik olacaqlar. Qədim canavar balaları ABŞ-də gizli bir yerdə hasarlanmış ərazidə yaşayırlar. Onlar mal əti, maral əti və at əti qarışığı, həmçinin xüsusi yemlə qidalanırlar.

Məqalədə izah edilib ki, qədim canavarları "diriltmək" asan olmayıb. "Colossal" şirkəti nəsli kəsilmiş heyvanların DNT-sini ehtiva edən nümunələr tapmaq üçün ABŞ-də müxtəlif muzeylərlə əlaqə saxlayıb, nəticədə Aydahoda 72 min yaşlı kəllə və Ohayoda 13 min yaşlı diş tapılıb. Bildirilib ki, qorxunc canavarlar soyuq iqlim şəraitində yaşamayıblar, buna görə də DNT o qədər də yaxşı qorunmayıb və gen toplusunu əldə etmək çətin olub.

Alimlər komandası boz canavarın hüceyrələrini götürüb və qədim canavarın xüsusiyyətlərinə - böyük ölçüsünə, ağır əzələlərinə və ağ tükünə diqqət yetirərək 20 genom redaktəsi həyata keçirib, daha sonra bu hüceyrələri ev itlərinin yumurta hüceyrələrinə yerləşdiriblər, surroqat ana kimi isə iri tazı qarışıqlarından istifadə ediblər.

Telegramda izləyin