Yeni elektromobildən dünya rekordu

Çinin SAIC konserninin bir hissəsi olan "Roewe" brendi bazara yeni model - D6 indeksli elektrik sedanını təqdim etməyə hazırlaşır.

Oxu.Az "Car News China"ya istinadən xəbər verir ki, yeni model Sinhay-Tibet magistralında 100 kilometrə 9,125 kilovat-saat sərfiyyat göstərərək enerji səmərəliliyi üzrə dünya rekordu vurub. Bu nailiyyət Ginnesin Rekordlar Kitabına düşüb.

Ümumi uzunluğu 1973 kilometr olan Sinhay-Tibet avtomobil yolu dünyanın ən yüksək dağ yolu hesab olunur. Burada dəniz səviyyəsindən orta hündürlük 4 min metrdən çoxdur. "Roewe D6" beş gün ərzində sınaqdan keçirilib.

Sedanın əsas versiyası 129 at güclü elektrik mühərriki və 42,8 kilovat-saatlıq akkumulyatorla təchiz edilib ki, bu da 450 kilometr məsafəni qət etmək üçün kifayətdir. Digər texniki xüsusiyyətlər hələ açıqlanmayıb.

Modelin debütünün bu ay Şanxay avtosalonunda baş tutacağı gözlənilir.

Telegramda izləyin