Ticarət müharibəsinin zərbə vurduğu ölkə: Vyetnamda qum tükənir

Vyetnamda iqtisadi artım və nəqliyyat infrastrukturunun inkişafı səbəbindən qum tükənir.

Oxu.Az-ın xəbərinə görə, bu barədə "Bloomberg" nəşri məlumat verib.

Məlumata görə, 2018-ci ildə Donald Tramp Çinlə ticarət müharibəsinə başlayıb və bu da zavodların Çindən Vyetnama köçürülməsi ilə nəticələnib. Bu vəziyyət 2024-cü ildə ÜDM-nin (Ümumi Daxili Məhsul) 7%-ə qədər artdığı bu ölkədə iqtisadi yüksəlişə səbəb olub.

Lakin istehsalın artması nəqliyyatda problemlərə yol açıb. Bu problemlərin həlli məqsədilə Vyetnam hökuməti yolların genişləndirilməsi və yeni marşrutların yaradılması üçün irimiqyaslı infrastruktur layihələri həyata keçirməyə başlayıb. Tikinti üçün isə əsas resurs olaraq Kamboca qumu istifadə olunub.

Amma indi Vyetnamda qum qıtlığı yaşanır. Qum çaylardan çıxarılır, lakin bir sıra sahillərin çökməsi nəticəsində evlərin dağılmasına və yerli sakinlərin etirazlarına səbəb oldu. Buna görə də, hakimiyyət sənayenin tənzimlənməsi ilə bağlı qaydaları sərtləşdirib.

"Magistral yol layihələrini təmin etmək üçün qum hasilatını genişləndirmək çətindir, çünki hökumət bu sənaye sahəsini daha ciddi şəkildə tənzimləyir," - deyə Hanoydakı RMIT Universitetinin infrastruktur üzrə mütəxəssisi Xunq Nguen bildirib.

Hasilatın genişləndirilməsi ilə bağlı həll yollarını axtaran Vyetnam səlahiyyətliləri keçən il Mekonq çayından qum almaq üçün Kambocaya müraciət ediblər. Kambocanın qum idxalı 2023-cü ildə üç dəfə, 2024-cü ildə isə iki dəfə artıb.

İndi Vin-Sıonq şəhəri hər gün yüzlərlə barj qəbul edir. "Planet Labs" və "Maxar Technologies"in peyk görüntülərinə görə, 2020-ci ilin fevralında orada 83 barj olduğu halda, 2024-cü ilin 9 mart tarixində bu rəqəm 385 barja çatıb.

Telegramda izləyin