Monitorinq imtahanında nə baş verib? - Şagirdlər ağlayaraq çıxdı - VİDEO

Mayın 17-də 8 nömrəli məktəbin "4с" sinfinin şagirdləri saat 09:00-da monitorinq imtahanına girsələr də, imtahan vərəqələri onlara 3-4 saat sonra paylanılıb.

Bunu Baku TV-nin "qaynar xətt"inə şikayət edən valideynlər söyləyiblər.

Onların iddialarına əsasən, imtahan başlayandan 150 dəqiqə sonra bitməli olsa da, şagirdlər 4-5 saat məktəbdən buraxılmayıblar. Təhsil müəssisəsinin qarşısında gözləyən valideynlər bu haldan narahat olaraq övladlarının buraxılmasını tələb ediblər. Buna görə də onlarla məktəb işçiləri və imtahana nəzarət edən təhsil idarəsinin əməkdaşları arasında gərginlik yaşanıb. Valideynlərin tələbindən sonra uşaqlar təşviş və göz yaşları içində məktəb binasından çıxıblar.

4-cü sinif şagirdləri bildiriblər ki, imtahan vərəqələri təqdim olunana qədər sinif otaqlarında gözləməli olublar. Beləliklə də şagirdlərə sualları cavablandırmaları üçün verilən 150 dəqiqəlik imtahan müddəti tam olaraq təmin olunmayıb, onlar cəmi 60 dəqiqə ərzində imtahandan çıxmağa məcbur olublar.

Məsələ ilə bağlı Bakı Şəhəri üzrə Təhsil İdarəsindən isə bildirilib ki, mayın 17-də 4-cü sinif şagirdləri üçün keçirilən monitorinq zamanı bir imtahan mərkəzində qısa müddət ərzində yaranan texniki məsələlərlə bağlı operativ tədbirlər görülüb. Uşaqlara optimal vaxt ərzində biliklərini nümayiş etdirmək üçün müvafiq müddətin verilməsi təmin olunub. Monitorinq şəffaf şəkildə keçirilib və heç bir əlavə ajiotaj yaranmayıb.(oxu.az)

Ətraflı süjetdə:

Telegramda izləyin