İğdırdan Naxçıvana gələn avtobusda dəhşətli qəza - 4 azərbaycanlı öldü, 26-sı yaralandı - VİDEO - FOTO - YENİLƏNDİ

Türkiyənin İğdır vilayətində baş vermiş ağır yol qəzası nəticəsində ölən Azərbaycan vətəndaşlarından ikisinin şəxsiyyəti məlum olub.
Hadisə nəticəsində ölən 8 nəfərdən 4-ü Azərbaycan vətəndaşıdır. Onlardan ikisi Naxçıvan sakinləri Süleyman Əliyev və Fərhad Fərhadlıdır. Üzərində sənədi olmayan, lakin azərbaycanlı olduğu ehtimal edilən yaşlı bir qadınla 13 yaşındakı qız uşağının şəxsiyyəti isə hələ müəyyənləşməyib.
***
"Qəza saat 08:30-da baş verib. Qəzaya əsasən, dumanlı hava şəraiti səbəb olub. Yaralılar arasında 26 Azərbaycan vətəndaşı var. Son məlumata görə, ölənlərdən 5-i Azərbaycan vətəndaşıdır. Yaralıların şəxsiyyəti artıq qismən bəllidir. Ölənlərin şəxsiyyəti hələ bəlli deyil. Çünki vəfat edənləri avtobuslardan hələ indi çıxarırlar".
Bunu Teleqraf.com-a açıqlamasında Azərbaycanın Qarsdakı baş konsulu Nuru Quliyev bildirib. O qeyd edib ki, qəza Türkiyə-Azərbaycan sərhədindən təqribən 25 kilometr aralıda baş verib.
Baş konsul qeyd edib ki, hər iki avtobus adi qaydada, normal günlük reyslərini yerinə yetirirmişlər: "Avtobuslardan biri "İğdır turizm", digəri "Metro" firmasına aiddir. "İğdır turizm"də Azərbaycan vətəndaşı daha çox olub".
Yaralıların İğdır dövlət xəstəxanasına aparıldığını vurğulayan N.Quliyev hal-hazırda baş həkimin otağında olduğunu qeyd edib: "Baş konsulluğun burda – İğdırda nümayəndəsi var. Hadisə baş verən andan İğdır nümayəndəmiz hadisə yerindədir. Hal-hazırda baş konsulluğun 4-5 əməkdaşı ilə biz burda hərəmiz müxtəlif istiqamətlərdə fəaliyyət göstəririk. Mən hadisə barədə məlumat alan kimi dərhal Qarsdan İğdıra gəlmişəm".
Baş konsul yaralılara maksimum səviyyədə tibbi xidmət göstərildiyini söyləyib: "Hazırkı məlumatlara yalnız onu əlavə etmək olar ki, yaralıların ikisinin vəziyyəti ağırdır. Onlar da yüksək səviyyədə əməliyyat olunur, bizim burda neyrocərrahımız da var. Onunla da bu barədə söhbət edirik".
***
Türkiyənin İğdır vilayətində baş vermiş ağır yol qəzası nəticəsində 4 Azərbaycan vətəndaşı ölüb.
Bunu Trend-ə Türkiyə parlamentinin İğdır vilayətindən olan deputatı Nurəddin Aras deyib.
Onun sözlərinə görə, qəza nəticəsində ölən 8 nəfərdən 4-ü Azərbaycan vətəndaşıdır.
***
Türkiyənin İğdır vilayətində baş vermiş ağır yol qəzası nəticəsində 26 Azərbaycan vətəndaşı xəsarət alıb.
Bu barədə Trend-ə Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev deyib.
Onun sözlərinə görə, hazırda Azərbaycanın Türkiyənin Qars şəhərindəki Baş konsulluğu ölənlər arasında azərbaycanlıların olub-olmamasını araşdırır.
***
İqdır-Naxçıvan avtomobil yolunda baş verən qəzada ümumilikdə 20 nəfər yaralanıb, 7 nəfər ölüb.
Publika.az xəbər verir ki, bu barədə Apa-ya Azərbaycanın Qarsdakı baş konsulu Nuru Quliyev məlumat verib.
O bildirib ki, ölən və yaralanan azərbaycanlıların sayı və şəxsiyyəti dəqiqləşdirilir: "Ölən və yaralananlar arasında azərbaycanlıların sayı böyük ehtimalla çox olacaq. Çünki Naxçıvana gedib-gələn xətt olduğuna görə orada sərnişinlərin böyük əksəriyyəti Azərbaycan vətəndaşı olur".
***
İqdır-Naxçıvan avtomobil yolunda baş verən qəzada ölən və yaralananlar arasında azərbaycanlılar da var.
Bu barədə Azərbaycanın Qarsdakı Baş konsulluğundan məlumat verilib.
***
Bu gün səhər saatlarında Türkiyə və Naxçıvan arasındakı Dilucu sərhəd-keçid məntəqəsi yaxınlığındakı yolda ağır yol qəzası baş verib.
Məlumata görə, İqdır rayonunun Aralıq rayonu və Dilucu sərhəd-keçid məntəqəsi arasındakı yolda iki sərnişin avtobusu toqquşub.
Qəzaya səbəb havanın dumanlı olması və ötmə əməliyyatının düzgün yerinə yetirilməməsi olub.
İqdır Valisi Əhməd Turqay Alpman qəza nəticəsində 6 nəfərin öldüyünü, 16 nəfərin yaralandığını bildirib.
Qəza yerinə çoxlu sayda təcili yardım və polis maşınları göndərilib. Toqquşan avtobuslarda sıxılmış vəziyyətdə qalan yaralılar var. Hazırda həmin yaralıların xilas edilməsi yönündə tədbir görülür.

mənbə: trend

Telegramda izləyin