Fahriye Evcen və Burak Özçivit cütlüyündən şiddət iddialara cavab: "Hüquqi tədbirlər görüləcək"

Məşhur cütlük Fahriye Evcen və Burak Özçivit, evliliklərində problem yaşadıqları və şiddət iddiaları ilə bağlı sosial şəbəkə üzərindən açıqlama yayımlayıb.

Sonxeber.az türk mediasına istinadən xəbər verir ki, cütlük çıxan xəbərləri yalanlayaraq, bu iddialar səbəbilə hüquqi addımlar atacaqlarını bildirib.

Şiddət iddialarının əsassız olduğunu vurğulayan Evcen və Özçivit, yayılan xəbərlərin onları dərindən üzdüyünü və məsələ ilə bağlı məhkəmə yoluna müraciət edəcəklərini açıqlayıb.

İddiaların başlanğıcı

"Çalıkuşu" serialının çəkiliş meydanında tanış olub evlənən cütlük, 2017-ci ildən bəri "nümunəvi ailə" kimi tanınıb. Lakin son illərdə sosial mediada birlikdə paylaşım etməmələri və müxtəlif davranışları evliliklərində problemlər olduğu barədə söz-söhbətlərə səbəb olub.

Bir neçə gün öncə Fahriye Evcen-in Instagram hesabından "Özçivit" soyadını silməsi, boşanma iddialarını yenidən gündəmə gətirib. Bu dəyişiklik qısa müddətdə sosial mediada müzakirə olunub və "ayrılırlar?" sualları ortaya çıxıb.

Daha sonra aktrisa soyadını yenidən profilinə əlavə edib. Ardınca cütlük birlikdə çəkildikləri səmimi fotonu paylaşaraq "hər şey qaydasındadır" mesajı verib.

Yeni iddialar və reaksiyalar

Bütün bunlardan sonra isə "Beyaz Magazin" proqramında cütlüyün evində şiddətli mübahisə yaşandığı, səs-küyün qonşular tərəfindən eşidildiyi, münaqişənin tətil zamanı da davam etdiyi iddia olunub. Sosial mediada Evcen-in profilində etdiyi dəyişikliklərin də bu gərginliyin əks-sədası olduğu irəli sürülüb.

Xəbərin yayılmasının ardından sosial mediada müxtəlif reaksiyalar gəlib. İzləyicilərin bir qismi cütlüyü müdafiə edib, digərləri isə iddiaların doğruluğunu sorğulayıb.

Cütlükdən sərt açıqlama

Artan müzakirələrə cavab olaraq Evcen və Özçivit sosial mediada yazılı açıqlama yayımlayıb:

"Ailə həyatına, ailə institutuna bir az hörmətiniz olsun. İddia adı altında bizə, ailəmizə yönəlik yayılan bu əsassız xəbərlərlə bizi yıpratma cəhdləri davam edərsə, məsul şəxslər haqqında hüquqi proses başlanacaqdır."

Telegramda izləyin