Facebook və YouTube-a girişdə niyə problem yaranıb? - Osman Gündüz danışdı

"Qlobal resurslara girişdə problem olması müəyyən yenilənmə işlərinin, yeni xidmətlərin işə salınması ilə əlaqədar ola bilər".

Bu sözləri Sonxeber.az-a açıqlamasında Milli İnternet Forumunun sədri, müstəqil ekspert Osman Gündüz ötən gün YouTube-da yaranan giriş probleminin ardından bu gün də sosial şəbəkə nəhəngi Facebookun eyni problemlə üzləşməsinə münasibət bildirərkən deyib.
Onun sözlərinə görə, zaman-zaman qlobal resurslarda girişlə bağlı problemlər olur. Biz müşahidə edirik ki, həm facebook həm də digər qlobal resurslar arasında müəyyən rəqabət gedir. Biri digərininin funksiyalarını ələ keçirmək istəyir. Düşünürəm ki, yeni xidmətlərlə bağlı yaranan problemlərdir. Bu məsələ ilə bağlı qurumun rəhbərləri problem ciddi olanda açıqlama verirlər.

"Düşünmürəm ki, sosial resurslarda yaranmış problem hansısa hücum yaxud məhdudlaşma ilə bağlı olsun. İstənilən halda qurumun rəhbərləri məsələ ilə bağlı açıqlama versələr yaxşı olardı. Lakin, burada ciddi problemin ola biləcəyini hesab etmirəm. Bu cür qlobal resurslar müxtəlif ölkələrdə olan serverlərə yerləşdirilir. Əsas resurslar səpələnmiş halda olur. Ola bilsin ki, müxtəlif ölkələrdə olan böyük şirkətlərin resurslarına girişdə müəyyən problemlər olub", O. Gündüz deyib.

Qeyd edək ki, dünən YouTube-da yaranan giriş probleminin ardından bu gün də sosial şəbəkə nəhəngi Facebook eyni problemlə üz-üzə qalıb.

Dünən axşam YouTube-a giriş təxminən 1 saat mümkün olmayıb. Sayta girmək istəyən istifadəçilər "500 Internal Server Error" səhvi ilə qarşılaşıblar. İndi də ölkəmizdə bir o qədər hiss edilməsə də Avropanın bir sıra ölkələrində Facebook-a girişdə problem yaranıb.

Türkiyədə və ABŞ-da hiss edilməyən bu problem, xüsusilə xəbər lentinin işləməməsi ilə müşahidə olunur. Avropanın bir sıra ölkələri ilə yanaşı, Asiya və Uzaq Şərq ölkələrində bənzər problemlər müşahidə olunmaqdadır.

Problemlə əlaqədar Facebook tərəfindən bu dəqiqəyə kimi heç bir açıqlama verilməyib. Yaranan problemin səbəbi də bu dəqiqəyə qədər məlum deyil.

Aysel Kərimova

Telegramda izləyin