Qadın və kişi münasibətləri niyə çox zaman alınmır? - AÇIQLAMA

Qadın və kişi münasibətləri insan həyatının ən mürəkkəb və həssas sahələrindən biridir.

Sevgi ilə başlayan əlaqələrin bir hissəsi zamanla anlaşılmazlıq, emosional uzaqlaşma və məyusluqla nəticələnir. Çox vaxt insanlar münasibətin niyə alınmadığını qarşı tərəfin davranışları ilə izah etməyə çalışırlar. Halbuki psixoloji baxımdan səbəblər daha dərin və çoxqatlıdır.

Bəs görəsən niyə qadın və kişi münasibətləri niyə çox zaman alınmır?

Psixoloq G.Qdərili bu barədə Sonxeber.az -a açıqlama verib:

"Qadın və kişilər sevgini hiss etmək və ifadə etmək baxımından fərqli ola bilərlər. Qadınlar üçün sevgi çox vaxt diqqət, dinlənilmək, emosional yaxınlıq və sözlə ifadə olunan qayğı deməkdir. Kişilər isə sevgini daha çox məsuliyyət almaq, problemləri həll etmək, maddi və praktiki dəstək göstərməklə ifadə edirlər. Bu fərqlilik tərəflərin bir-birini səhv anlamasına gətirib çıxarır. Qadın "mənə maraq göstərmir" deyə düşünə, kişi isə "əlimdən gələni edirəm" hissi ilə özünü haqsız yerə tənqid olunmuş saya bilər.

Münasibətlərin alınmamasının əsas səbəblərindən biri gözləntilərin açıq şəkildə ifadə olunmamasıdır. İnsanlar çox vaxt qarşı tərəfin onların ehtiyaclarını demədən anlamasını gözləyir. Danışılmayan gözləntilər zamanla yığılan incikliklərə, küskünlüyə və emosional soyumaya səbəb olur. Sevgi münasibətində səssizlik əksər hallarda anlaşma yox, uzaqlaşma yaradır.

Keçmiş təcrübələr və emosional travmalar da münasibətlərin gedişinə ciddi təsir edir. Əvvəlki münasibətlərdə yaşanan xəyanət, tərk edilmə və ya dəyərsiz hiss edilmə yeni münasibətə şüursuz şəkildə daşınır. İnsan fərqində olmadan ya həddindən artıq bağlı olur, ya da özünü qorumaq üçün emosional məsafə saxlayır. Bu isə sağlam yaxınlığın formalaşmasına mane olur.

Digər mühüm məqam fərdi sərhədlərin qorunmamasıdır. Sevgi adına özünü tamamilə itirmək, şəxsi ehtiyacları arxa plana atmaq bir müddət sonra daxili narazılıq yaradır. Münasibətdə iki ayrı fərd olduğu unudulduqda, tərəflərdən biri boğulmuş, digəri isə məsuliyyət altında qalmış hiss edə bilər.

Nəhayət, bir çox münasibətlərdə sevgi anlayışı ilə asılılıq qarışdırılır. Sevilmək ehtiyacı, tək qalmaq qorxusu və ya "məni xilas edəcək" gözləntisi üzərində qurulan münasibətlər uzunömürlü olmur. Sağlam sevgi iki emosional olaraq yetkin insanın bir-birini tamamlamasıdır, bir-birinin boşluğunu doldurması yox.

Psixoloji baxımdan sevgi münasibətlərinin alınması üçün əsas şərt qarşılıqlı ünsiyyət, emosional məsuliyyət və özünü tanımaqdır. İnsan əvvəlcə öz ehtiyaclarını və yaralarını dərk etdikdə, qarşı tərəflə daha sağlam və real bağ qura bilir. Sevgi təkcə hiss deyil, eyni zamanda öyrənilən və qorunan bir münasibət formasıdır".

Telegramda izləyin