15 yaşlı Məryəmin cəsarəti, alovların içindən uşağı xilas etdi - Milyonluq mükafat! - VİDEO

Dağıstanın Xasavyurt şəhərində 15 yaşlı məktəbli Məryəm Akavova yanan avtomobildə köməksiz qalan azyaşlı uşağı ölümdən xilas edib. Yeniyetmənin göstərdiyi cəsarət böyük əks-səda doğurub.

Musavat.com xəbər verir ki, hadisə oktyabrın 27-də baş verib.

Şəhərin 5 nömrəli məktəbinin 9-cu sinif şagirdi Məryəm küçədən keçərkən dayanmış "Lada Priora" markalı avtomobilin içərisində azyaşlı uşağın olduğunu görüb. Bu zaman maşının ön hissəsində yanğın başlayıb.

Avtomobilin qapıları bağlı olsa da, pəncərələrdən biri azacıq açıq olub. Məryəm vaxt itirmədən uşağı pəncərədən çıxararaq təhlükəsiz məsafəyə aparıb və ətrafdakılardan təcili yardım xidmətlərinə xəbər vermələrini istəyib.

Uşaq xilas edildikdən az sonra alov bütün avtomobili bürüyüb. Xoşbəxtlikdən nə Məryəm, nə də azyaşlı xəsarət alıb.

Hadisədən sonra RT telekanalının və "Rossiya Seqodnya" beynəlxalq media qrupunun baş redaktoru Marqarita Simonyan məktəbliyə Tiqran Keosayan adına 1 milyon rubl məbləğində mükafat veriləcəyini açıqlayıb.

Simonyan bildirib ki, uşağı ölümdən xilas edən 15 yaşlı Məryəmin qəhrəmanlığı xüsusi qiymətləndiriləcək.

Məlumata görə, Dağıstan Fövqəladə Hallar Nazirliyinin rəhbəri Müslüm Devrişbekov da məktəbliyə xüsusi mükafat təqdim edilməsi barədə qərar qəbul edib. Xasavyurt yanğın-xilasetmə hissəsinin rəisi Anvar Salmanov artıq Məryəm və onun anası ilə görüşərək yeniyetməyə təşəkkürünü bildirib.

Bundan başqa, Xasavyurt şəhərinin rəhbəri Korqoli Korqoliyev də Məryəmlə görüşərək onun cəsarətini qiymətləndirəcəyini açıqlayıb.

Hadisə ilə bağlı daha bir mühüm məqam ortaya çıxıb. Dağıstan prokurorluğu azyaşlı uşağın yanan avtomobildə necə tək qalmasının səbəblərinin araşdırılmasına başlayıb.

Telegramda izləyin