Kafe və restoran sahiblərinin diqqətinə: Səsləndirilən musiqiyə görə ödəniş məcburidirmi? - Vəkildən açıqlama

Son illər restoran, kafe və ictimai iaşə obyektlərində səsləndirilən musiqilərlə bağlı müəllif hüquqları məsələsi gündəmdədir. Bir çox sahibkar ictimai məkanda səsləndirilən musiqiyə görə əlavə ödəniş edib-etməməli olduqları ilə bağlı tərəddüd yaşayır. Bu məsələ həm biznes sahibləri, həm də müəllif hüquqları sahibləri üçün aktual hüquqi mövzudur.
Bəs, restoran və kafelərdə səsləndirilən musiqilərə görə müəssisə sahibləri qanunvericiliyə əsasən müəllif hüququ haqqı ödəməyə borcludurmu?

Mövzu ilə bağlı Sonxeber.az-a vəkil Turan Abdullazadə danışıb.

O, açıqlamasında qeyd edib ki, ümumilikdə restoran, kafe və digər ictimai iaşə obyektlərində səsləndirilən, müəlliflik hüququnun obyekti olan musiqiyə görə müəssisə sahibləri müəllif hüququ haqqı ödəməyə borcludurlar:

"Bu öhdəlik Azərbaycan Respublikasının "Müəlliflik hüququ və əlaqəli hüquqlar haqqında" Qanunundan irəli gəlir.

Qanunda qeyd olunur ki, müəlliflik hüququnun yaranması və həyata keçirilməsi üçün əsərin qeydiyyata alınması və ya hər hansı digər üsullarla rəsmiləşdirilməsi tələb olunmur.

Qanuna əsasən, aşağıdakılar müəlliflik hüququnun obyektləri deyildir:

a) rəsmi sənədlər (qanunlar, məhkəmə qərarları, qanunvericilik, inzibati və məhkəmə xarakterli digər mətnlər), habelə onların rəsmi tərcümələri;
b) dövlət rəmzləri və nişanları (bayraqlar, gerblər, himnlər, ordenlər, pul nişanları, digər dövlət rəmzləri və nişanları);
v) xalq yaradıcılığı (folklor) nümunələri;
q) günün yenilikləri, müxtəlif hadisə və faktlar barədə informasiya xarakterli məlumatlar.

Deməli, digər əsərlər müəlliflik hüququnun obyekti hesab olunur.

Əsəri qeydiyyatdan keçirən hüquq sahibinə nümunəsi müvafiq icra hakimiyyəti orqanı tərəfindən təsdiq edilmiş şəhadətnamə verilir. Bu şəhadətnamə müəlliflik prezumpsiyası kimi çıxış etmir. Mübahisə yaranan hallarda, digər sübutlar olmadıqda, qeydiyyat haqqında şəhadətnamə məhkəmə tərəfindən müəlliflik prezumpsiyası kimi tanınır.

Müəllif öz əsərini daha ciddi şəkildə qorumaq istəyirsə, tövsiyə olunur ki, əsərini müvafiq icra hakimiyyəti orqanında qeydiyyatdan keçirsin.

Belə hallarla qarşılaşan müəllif müəssisə sahibindən bu pozuntunun aradan qaldırılmasını tələb edə, habelə musiqinin səsləndirilməsi ilə bağlı tərəflər arasında razılıq əldə oluna bilər. Razılıq əldə olunmadığı və pozuntular davam etdiyi təqdirdə isə müəllif məhkəməyə müraciət edə bilər".

Vüsalə İbrahimli

Telegramda izləyin