532 məktəbli intihar edib - 46 ilin REKORDU

Yaponiyada uşaqlar və yeniyetmələr arasında record intihar qeydə alınıb.

Lent.az xarici mediaya istinadla bildirir ki, ölkənin Səhiyyə, Əmək və Sosial Rifah Nazirliyinin məlumatına görə, 2025-ci ildə məktəblilər arasında intiharların sayı rekord həddə - 532-yə çatıb. Bu, 1980-ci ildən bəri aparılan rəsmi statistika dövründə qeydə alınmış ən yüksək göstəricidir. Xüsusi narahatlıq doğuran məqam isə odur ki, bu yaş qrupunda intihara daha çox qızlar əl atır. Bu da ölkə üzrə ümumi demoqrafik tendensiyadan fərqlənir.

Paradoksal olaraq, bu faciəli uşaq statistikası fonunda Yaponiyada ümumi intiharların sayı azalmağa davam edir. 2025-ci ildə əhalisi təxminən 124 milyon nəfər olan ölkədə 20 mindən az insan həyatına son qoyub ki, bu da əvvəlki illərlə müqayisədə müsbət dinamika sayılır.

Məsələn, 2024-cü ildə ümumi intihar sayı 20 268 olub və onların böyük əksəriyyəti, 13 763 hadisə kişilərin payına düşüb. Lakin azyaşlılar arasında vəziyyət əksinədir və pisləşməkdə davam edir.

Ötən ilin məlumatlarına əsasən, uşaq intiharlarının 349-u yuxarı sinif şagirdləri arasında qeydə alınıb. 2025-ci ildə müəyyən olunan yeni rekord isə təhsil mühitində təzyiq, kibertəhqir, sosial təcrid və vaxtında psixoloji yardım almaqda çətinlik kimi sistemli problemlərin mövcudluğuna işarə edir.

Bu hesabat yapon cəmiyyəti və hakimiyyət orqanları üçün ciddi çağırışa çevrilib və gənc nəslin psixi sağlamlığının dəstəklənməsini gücləndirmək, həm məktəblərdə, həm də onların hüdudlarından kənarda uşaqlar üçün daha təhlükəsiz və açıq mühitin yaradılması istiqamətində təxirəsalınmaz tədbirlərin görülməsini tələb edir.

Telegramda izləyin