Sahibsiz itlər orta yaşlı qadına hücum etdi

Gəncə şəhərində sahibsiz itlərin hücumu nəticəsində orta yaşlı bir qadın ciddi xəsarətlər alıb. Hadisə Mikayıl Hüseynov küçəsində qeydə alınıb.

Milli.Az xəbər verir ki, ərazi sakinlərinin sözlərinə görə, bu, sahibsiz itlərin insanlara hücum etməsi ilə bağlı ilk hal deyil. Onlar bildirirlər ki, küçələrdə itlərin sayı getdikcə artır və bu da təhlükəni daha da böyüdür.

Hadisənin şahidi olan sakinlərdən biri bildirib ki, qadının kömək çağırışını eşidərək hadisə yerinə qaçıb:

"Gördüm ki, qadın yerə yıxılıb və ətrafına 15-20 it yığışıb. Əgər yıxılmasaydı və başından zədə almasaydı, vəziyyət daha da ağır ola bilərdi".

Digər bir sakin isə yaranmış vəziyyətdən narahatlığını ifadə edib:

"Uşaqları küçəyə buraxa bilmirik, sanki ev dustağı olmuşuq. Böyüklər də çətinliklə hərəkət edir. Küçədə uşaq görmək mümkün deyil. Məsələ ilə bağlı müraciətlər etsək də, nəticə yoxdur. Gəlib tədbir görən yoxdur, itlərin çoxalmasının qarşısı alınmır".

Məsələ ilə bağlı Gəncə Şəhər İcra Hakimiyyətindən bildirilib ki, şəhər ərazisində sahibsiz itlərlə bağlı ildə iki dəfə tədbirlər həyata keçirilir.

Qeyd olunub ki, bu aksiyalar Azərbaycan Dövlət Aqrar Universitetinin Baytarlıq fakültəsinin iştirakı ilə təşkil olunur və proses çərçivəsində sahibsiz itlər qısırlaşdırılır. Hər tədbir zamanı orta hesabla 200-dən artıq küçə iti bu prosesə cəlb edilir.

Telegramda izləyin