Uşaqların sosial şəbəkələrdə keçirdiyi vaxt onların psixologiyasına necə təsir edir? - AÇIQLAMA

Müasir uşaqların gündəlik həyatında sosial şəbəkələr getdikcə daha böyük yer tutur. Telefon və planşet ekranları vasitəsilə dostları ilə ünsiyyət quran, oyun oynayan və videolar izləyən uşaqların psixoloji inkişafına bu vərdişlər necə təsir edir? Uşaqların sosial şəbəkələrdə keçirdiyi vaxt onların psixologiyasına necə təsir edir?

Psixoloq G.Qədirli bu barədə Sonxeber.az -a açıqlama verib:

"Uşaqların sosial şəbəkədə keçirdiyi vaxt onların psixikasına həm müsbət, həm də mənfi təsir göstərə bilər. Müsbət tərəfdən, sosial platformalar uşaqlara sosial əlaqələr qurmaq, yeni biliklər əldə etmək və yaradıcılıq bacarıqlarını inkişaf etdirmək imkanı verir. Lakin həddindən artıq vaxt sərf etmək diqqət dağınıqlığı, yuxu pozuntuları və emosional gərginlik yarada bilər. Sosial müqayisələr və "like" meyarları uşaqlarda özünəinamın zəifləməsinə, bəzən isə depressiya və narahatlıq hisslərinə yol aça bilər.

Valideynlərin rolu burada böyükdür. Onlar uşaqların sosial şəbəkə fəaliyyətini izləməli, təhlükəli məzmundan qorunmalarına yardım etməli və onlayn təcrübələr barədə açıq danışmalıdırlar. Optimal balans və keyfiyyətli kontent seçimi uşağın psixoloji sağlamlığının qorunmasında əsas amildir".

Telegramda izləyin