Tovuzun kəndləri qazsız qalıb: sakinlər çətin şəraitdə yaşayır - AZƏRİQAZDAN AÇIQLAMA

Tovuz rayonunun bir sıra kəndlərində illərdir davam edən qaz problemi sakinlərin gündəlik həyatını ciddi şəkildə çətinləşdirir. Qəriblisovetli, Ağdərə, İskəndlik, Şamlıq, Ağbaşlar və digər yaşayış məntəqələri daxil olmaqla 10-dan çox kənddə təbii qazın olmaması xüsusilə qış aylarında əhalini ağır vəziyyətlə üz-üzə qoyur. Sakinlər isitmə, yemək bişirmə və məişət ehtiyaclarını qarşılamaq üçün alternativ vasitələrdən istifadə etməyə məcbur qalır, bu isə həm əlavə maliyyə yükü yaradır, həm də təhlükəsizlik risklərini artırır. Yerlİ sakinlərin sözlərinə görə, dəfələrlə aidiyyəti qurumlara müraciətlər edilsə də, problem hələ də tam həllini tapmayıb.

Regionların sosial infrastrukturunun yaxşılaşdırılması istiqamətində müxtəlif dövlət proqramlarının icra olunduğu bir vaxtda, qazlaşdırılmayan kəndlərin mövcudluğu məsələni yenidən gündəmə gətirir. Bəs illərdir gözlənilən qaz təminatı niyə gecikir və problemin həlli üçün hansı addımlar atılmalıdır?
Mövzu ilə bağlı "Azəriqaz" İstehsalahat Birliyinin mətbuat xidmətinin rəhbəri Eldəniz Vəliyev BiG.AZ-a açıqlamasında bildirdi ki, Azəriqaz İstehsalat Birliyi regionlarda qazlaşma prosesini öz resursları hesabına həyata keçirir və bu baxımdan mərhələlik prinsipi qorunur. Yəni Tovuz rayonuda kifayət qədər qaz almış rayondur və sözügedən rayonun qazlaşdırılmayan bir neçə kəndinində qazlaşdırılması Azəriqaz İstehsalat Birliyinin maliyyə imkanlarından asılı olaraq, növbəti mərhələlərdə müzakirə mövzusu ola bilər.

Telegramda izləyin