Xaricdəki prestijli ali məktəbə qəbul olmaq üçün əsas şərt maddi imkanlardır, yoxsa bilik və əzmkarlıq? - AÇIQLAMA

Pirəkəşkül kənd tam orta məktəbinin şagirdi Nilufər Şükürova dünyanın nüfuzlu ali təhsil ocaqlarından biri olan NYU Shanghai universitetinə tam təqaüdlə qəbul alan ilk azərbaycanlı şagird kimi tarixə düşüb. Onun qazandığı təqaüdün illik məbləği 82 min ABŞ dollarıdır.

Məlumat sosial şəbəkələrdə yayıldıqdan sonra geniş müzakirələrə səbəb olub. Bəzi istifadəçilər hesab edir ki, bu səviyyədə uğurun arxasında əsasən valideynlərin maddi imkanı dayanır. Digərləri isə düşünür ki, nüfuzlu universitetə qəbul olmaq üçün həlledici amil şagirdin savadı, zəhməti və məqsədyönlü çalışmasıdır.

Bəs görəsən xaricdəki prestijli ali məktəbə qəbul olmaq üçün əsas şərt maddi imkanlardır, yoxsa bilik və əzmkarlıq?

Təhsil eksperti Şəmsi Qoca bu barədə Sonxeber.az -a açıqlama verib:

"Nilufər Şükürovanın bu möhtəşəm uğuru sadəcə fərdi bir nailiyyət deyil, eyni zamanda cəmiyyətdə kök salmış bəzi bədbin stereotiplərə qarşı verilmiş ən gözəl cavabdır. Pirəkəşkül kənd məktəbindən dünyanın ən nüfuzlu elm ocaqlarından biri olan NYU Şanxay universitetinə uzanan bu yol, əslində zəkanın və iradənin heç bir sərhəd tanımadığını sübut edir. Bir gəncin 82 000 dollar məbləğində tam təqaüd alması o deməkdir ki, dünya nəhəngləri onun potensialını hər hansı maddi imkandan qat-qat üstün tutur.

Lakin etiraf etmək lazımdır ki, cəmiyyətdə bu cür bədbin stereotipləri və ümidsizliyi körükləyən əsas amil Elm və Təhsil Nazirliyinin yarıtmaz fəaliyyəti, təhsil sistemində apardığı uğursuz eksperimentlərdir. Belə bir mühitdə Nilufərin uğuru nazirliyin yaratdığı süni maneələrə və keyfiyyətsiz təhsil siyasətinə rəğmən qazanılmış fərdi bir qəhrəmanlıqdır. Maddi imkanın hər şeyi həll etdiyi düşüncəsini insanların beyninə yeridən məhz dövlət məktəblərindəki boşluqlar və təhsil idarəçiliyindəki qüsurlardır. Nazirliyin fəaliyyətindəki bu axsamalar fonunda bir kənd uşağının dünya səviyyəsinə yüksəlməsi, mövcud sistemin deyil, şagirdin şəxsi zəkasının və ailəsinin fədakarlığının mütləq qələbəsidir.

Bu uğur həm də onu nümayiş etdirir ki, müasir informasiya dövründə paytaxtın ən bahalı liseyi ilə ucqar bir kənd məktəbi arasındakı divarlar uçub dağılıb. Əsas olan imkanların genişliyi deyil, hədəfin böyüklüyü və o hədəfə doğru yorulmadan addımlamaqdır. Nilufər Şükürova öz savadı ilə sübut etdi ki, əgər bir gəncin parlaq zəkası və sarsılmaz çalışqanlığı varsa, nazirliyin yaratdığı bürokratik və keyfiyyət çətinliklərinə baxmayaraq, dünyanın ən zəngin fondları belə onun təhsili üçün ödəniş etməyə hazır olacaq. Bu, zəhmətin həm maddi imkan, həm də yarıtmaz idarəçilik üzərindəki mütləq qələbəsidir".

Telegramda izləyin