Tramp "Cənab Prezident, məqsədiniz nədir?" sualını cavabsız qoydu

ABŞ Prezidenti Donald Trump İranla davam edən münaqişə fonunda Ağ Evə qayıdışı zamanı jurnalistlərin "Cənab Prezident, məqsədiniz nədir?" sualını cavabsız qoyaraq mətbuat nümayəndələrini görməzdən gəlib.

Sonxeber.az xarici mediaya istinadən xəbər verir ki, həmin anlar xarici mediada geniş rezonans doğurub və Vaşinqtonun müharibə strategiyası ilə bağlı qeyri-müəyyənlik müzakirə mövzusuna çevrilib.

Məlumata görə, ABŞ rəhbəri İranla qarşıdurmanın davam etdiyi bir vaxtda Ağ Evə dönüşü zamanı ölkəsinin İranla bağlı son hədəfinin nə olduğu barədə suala münasibət bildirməyib. Bu davranış beynəlxalq mətbuatda ABŞ-ın Yaxın Şərq siyasətində strateji istiqamətin aydın olmaması kimi qiymətləndirilib.

Ağ Ev administrasiyası İranı hədəf alan hərbi əməliyyatların davam etdirilməsi ilə bağlı qəti mövqe nümayiş etdirsə də, mümkün diplomatik addımlar barədə konkret açıqlama verməyib. Prezidentin "ABŞ-ın İranda son məqsədi nədir?" sualını cavabsız qoyması isə bu mövzuda müzakirələri daha da gücləndirib.

Son həftələrdə Vaşinqtonun Tehrana qarşı siyasəti həm hərbi, həm də diplomatik müstəvidə intensiv debatlara səbəb olub. ABŞ və İsrail arasında koordinasiyalı hücumların həyata keçirildiyi bildirilir. Bunun fonunda Ağ Ev İranla birbaşa diplomatik danışıqlardan çox hərbi təzyiq strategiyasına üstünlük verdiyini göstərir.

Beynəlxalq media orqanları Prezidentin sualları cavabsız qoymasını və İranla bağlı konkret strateji çərçivə açıqlamamasını tənqid edir. Şərhlərdə qeyd olunur ki, hərbi əməliyyatların davam etdiyi bir şəraitdə strateji hədəflərin ictimaiyyətə açıqlanmaması həm daxildə, həm də beynəlxalq aləmdə suallar doğurur.

Hazırda İranla ABŞ arasında gərginlik yüksək səviyyədə qalır. Vaşinqton əməliyyatların davam edəcəyini bəyan etsə də, tərəflərin ziddiyyətli açıqlamaları və media ilə münasibətlərdəki gərginlik beynəlxalq ictimaiyyətin diqqət mərkəzindədir.

Telegramda izləyin