İftar süfrəsi üçün reseptlər

Axşam.az "İftar menyusu"nu təqdim edir:

Toskana lobya şorbası

Ərzaq:
4 x.q. zeytun yağı (kərə yağı da istifadə edə bilərsiniz)
1 soğan (doğranmış)
2 kök (halqa-halqa doğranmış)
3 diş sarımsaq
2 kərəviz çubuqları (nazik-nazik doğranmış)
1 st. quru qırmızı və ya ağ lobya (bişirilmiş)
1 x.q. tomat (tomat yerinə qırmızı bibər pastası da istifadə edə bilərsiniz)
400 qr. pomidor
Bir dəstə ispanaq , azca qurudulmuş kəklikotu
2 st. ət və ya toyuq bulyonu
2 st. su
4-6 dilim çörək
Zövqə görə duz və qara istiot
Üzərinə səpmək üçün biraz parmezan pendiri

Hazırlanması:

Yağı bir qazanda qızdırın, içərisinə doğranmış soğan və kökləri tökün, vam xodda təxminən 10 dəqiqə qarışdıra-qarışdıra bişirin, soğan və köklər qızarmamalı, sadəcə yumşalmalıdırlar, üzərinə 2 diş sarımsağı doğrayıb tökün, pomidorları soyub, xırda doğrayıb tökün və tomat və doğranmış kərəviz çubuqlarını əlavə edin. Bulyonu və suyu, zövqə görə duzu və qara istiotu əlavə edin. Lobyaların yarısını çəngəllə əzib, şorbanın içinə əlavə edin. Təxminən 30 dəq. ağzıqapalı bişirin. Doğranmış ispanaq və ya pazını, lobyaların geri qalanını və kəklikotunu əlavə edib, ağzıqapalı bişirin. Çörək dilimlərinə bölünmüş sarımsağı sürtün və qızarması üçün sobaya qoyun. Şorbanız hazır olduqdan sonra boşqablara çəkib, üzərinə çörək dilimini qoyub, bir qədər də pendir rəndədən keçirib üzərinə töküb servis edə bilərsiniz.

Tava kababı

Ərzaqlar:

400 qram orta yağlı qoyun əti qiyməsi
1 soğan (rəndələnmiş)
2 pomidor (doğranmış)
2 yaşıl bibər (doğranmış)
2 diş sarımsaq (doğranmış)
1 çay qaşığı tomat pastası
1 çay qaşığı bibər pastası
1 çay qaşığı duz
1 çay qaşığı qara bibər
1/2 çay qaşığı çili bibəri
4 badımcan
3 pomidor

Üzəri üçün:
2 stəkan su
1 xörək qaşığı tomat pastası
1 çay qaşığı bibər pastası
2 xörək qaşığı yağ
1 çay qaşığı duz
1 ovuc cəfəri (doğranmış)

Hazırlanması:

Qiyməni soğan, pomidor, yaşıl bibər, sarımsaq, bibər pastası, tomat pastası, duz, qara bibər, zirə və çili bibərini bir qaba töküb yaxşıca yoğurun. Badımcan və pomidoru şaquli və ya maili şəkildə bıçaqla bir-birindən iki santimetr məsafədə kəsin. Hazırlanmış qiymə qarışığı tərəvəzlərin kəsilmiş hissələrinə doldurun. Tərəvəzləri qazana düzün. Bir qabda su, tomat pastası, yağ və duzu qarışdırın. Bu qarışığı qazandakı badımcan və pomidorun üzərinə tökün. Tərəvəzlər dağılmasın deyə boşqabla üzərini örtün və qazanın qapağını bağladıqdan sonra əvvəlcə orta odda, sonra isə zəif odda suyu çəkilənə qədər bişirin. Qazan kababını süfrəyə verərkən üzərinə doğranmış cəfəri səpin.

Şərbətli badam peçenyesi

Ərzaqlar:

Xəmir üçün:
Otaq temperaturunda yumuşaldılmış 125 qram kərə yağı
1 yumurta
1/2 çay stəkanı duru yağ
4 xörək qaşığı toz şəkər
2,5 stəkan un
5 xörək qaşığı mannı yarması
1 paket vanilin
1 paket qabartma tozu
1/2 çay stəkanı kokos

Şərbət üçün:
2 stəkan şəkər tozu
2,5 stəkan su
2 damcı limon suyu

Hazırlanması:

Əvvəlcə şərbəti hazırlayın. Qazana şəkər tozu və suyu töküb qaynadın. Qatılaşana yaxın limon şirəsi əlavə edin. Sobadan götürüb soyumağa qoyun. Xəmir üçün kərə yağı, yağ və şəkər tozunu əlavə edib çəngəllə qarışdırın. Sonra qarışığın üzərinə yumurta, kokos, qabartma tozu və vanili qoyun. Unu az-az əlavə edib ələ yapışmayan xəmir hazırlayın. Hazırladığınız xəmir qarışığından qoz böyüklüyündə parçalar götürün. Əllərinizlə badam şəklini verin. Yağlanmış soba qabına qoyun. Bıçağın köməyi ilə ortada kəsiklər edin və bir az yastıladın. Əvvəlcədən isidilmiş 180 dərəcə sobaya qoyun. Hərtərəfli qızarana qədər təxminən 30 dəqiqə bişirin. Badamlı desert bişdikdən sonra sobadan çıxarın və 1-2 dəqiqə ilkin istiliyin getməsini gözləyin. Sonra üzərinə soyuq şərbəti tökün. Üzərinə badam əzməsi səpin.

Telegramda izləyin