İlber Ortaylının vida mərasimində müzakirələrə səbəb olan görüntülər - VİDEO

Türkiyənin tanınmış tarixçisi və akademiki professor İlber Ortaylının vəfatından sonra İstanbulda yerləşən Qalatasaray Universitetində vida mərasimi təşkil olunub. Mərasimdə akademiklər, tələbələr və çoxsaylı vətəndaşlar iştirak edərək məşhur tarixçi ilə vidalaşıblar.

Sonxeber.az türk mediasına istinadən xəbər verir ki, lakin mərasim zamanı sosial şəbəkələrdə geniş müzakirələrə səbəb olan görüntülər ortaya çıxıb. Videolarda bəzi şəxslərin tanınmış alim Celal Şengör ilə selfi çəkdirmək üçün növbəyə durduğu görünür.

Mərasim əslində mərhum tarixçinin xatirəsini yad etmək məqsədi daşısa da, bəzi iştirakçıların davranışı ictimaiyyət tərəfindən hörmətsizlik kimi qiymətləndirilib. Sosial şəbəkə istifadəçiləri belə bir mərasimdə selfi çəkdirməyin etik olmadığını və mərhumun xatirəsinə uyğun davranış göstərilməli olduğunu bildiriblər.

Digər tərəfdən, bəzi istifadəçilər isə mərasimdə iştirak edən insanların tanınmış alimlə şəkil çəkdirmək istəməsini normal qarşıladıqlarını qeyd ediblər. Buna baxmayaraq, görüntülər qısa müddətdə internetdə yayılaraq geniş müzakirələrə səbəb olub.

Telegramda izləyin