Ürək və immunitet üçün hansı pomidorlar daha faydalıdır - çiy yoxsa bişmiş?

Pomidorlar yalnız dadlı və universal məhsul deyil, eyni zamanda çox faydalıdır. Onların tərkibində likopin adlı güclü antioksidant var ki, bu da ürək, damarlar və göz sağlamlığını qorumağa kömək edir.

Lent.az xəbər verir ki, likopin çiy pomidorlardan deyil, bişmiş pomidorlardan daha yaxşı mənimsənilir.

Niyə bişmiş pomidorlar daha faydalıdır?

Çiy pomidorlarda likopin hüceyrə divarlarının daxilində "bağlı" vəziyyətdə olur. Pomidorlar bişirildikdə, qızardıldıqda və ya souslara əlavə edildikdə onların strukturu dəyişir və likopin orqanizm üçün daha əlçatan olur. Bu səbəbdən pomidor şorbaları, souslar və ya bişmiş pomidorlar adi salatlardan daha faydalı hesab olunur. Daha yaxşı təsir üçün pomidorları bitki yağı, xüsusilə zeytun yağı ilə birlikdə istifadə etmək tövsiyə olunur. Çünki likopin yağda həll olunan maddədir və yağ onun daha yaxşı mənimsənməsinə kömək edir.

Pomidorların ürək və damarlar üçün faydası

Likopin oksidləşmə proseslərini azaldır. Məhz bu proses damar divarlarının zədələnməsinə səbəb olur. Bunun nəticəsində ateroskleroz riski azalır. Bundan əlavə, likopin "pis" xolesterinin oksidləşməsinin qarşısını alır və damar divarlarında yığılmasının qarşısını alır. Eyni zamanda damarların normal fəaliyyətini dəstəkləyir, onların elastikliyini artırır və spazm riskini azaldır.

Gözlər üçün faydaları

Pomidorlar göz sağlamlığı üçün də olduqca faydalıdır. Likopin digər antioksidantlarla birlikdə (lutein və zeaksantin) tor qişanın sağlamlığını qoruyur və yaşla bağlı dəyişikliklərin, o cümlədən makula degenerasiyasının riskini azaldır.

Pomidorların digər faydaları

Bişmiş pomidorların müntəzəm istifadəsi bəzi xərçəng növlərinin, xüsusilə mədə, ağciyər və prostat xərçənginin riskinin azalması ilə əlaqələndirilir. Bu təsir yalnız antioksidant xüsusiyyətlərlə deyil, həm də hüceyrə inkişafına təsiri ilə izah olunur. Pomidorlar həmçinin kalium, fol turşusu və C vitamini ilə zəngindir. Kalium ürəyin normal fəaliyyəti üçün vacibdir, fol turşusu və C vitamini isə maddələr mübadiləsində mühüm rol oynayır.

Kimlər ehtiyatlı olmalıdır?

Pomidorlar çox faydalı olsa da, hər kəs üçün uyğun deyil. Çiy pomidorlar bəzi insanlarda, xüsusilə qastroezofageal reflüks xəstəliyi olanlarda mədə yanmasını artıra bilər. Bu halda bişmiş variantlara üstünlük vermək daha məqsədəuyğundur. Podaqrası olan şəxslər də pomidoru ehtiyatla istifadə etməlidir, xüsusilə spirtli içkilər və ağır ət yeməkləri ilə birlikdə qəbul edildikdə. Həmçinin bəzi dərmanlar, xüsusilə beta-blokatorlar qəbul edilərkən kalium səviyyəsinə diqqət yetirmək lazımdır. Gündəlik yeməklərə 1-2 xörək qaşığı pomidor sousu əlavə etmək kifayətdir.

Telegramda izləyin