Uşaqları kitab oxumağa necə cəlb etmək olar? - Psixoloqdan mühüm tövsiyələr

"Kitablara maraq yalnız oxumaq bacarığının mənimsənilməsi ilə yaranmır. Əsas məsələ uşağın kitabları yeni məlumatlar əldə etmək və düşünmək üçün vasitə kimi qəbul etməsidir".

Oxu.Az xəbər verir ki, bunu Rusiya mətbuatına açıqlamasında psixoloq Darya Misiyukova bildirib.

Mütəxəssisin sözlərinə görə, mütaliəyə məcburiyyət olmadan, müntəzəm vaxt ayırmaqla yanaşıldıqda, oxumaq asanlıqla gündəlik həyatın bir hissəsinə çevrilə bilər. Psixoloq uşaqlarda kitablara maraq yaratmaq üçün bir neçə üsul təklif edib.

"Uşaqlarla birlikdə ucadan oxuyun. Bu, sərbəst oxumağı bacaran uşaqlar üçün də faydalıdır. Böyüklərin ifadəli nitqi əsərdəki qəhrəmanların xarakterini və əhvali-ruhiyyəsini daha yaxşı çatdırmağa kömək edir", - deyə psixoloq vurğulayıb.

Misiyukova qısa mətnlər seçməyi və hekayənin ən maraqlı məqamında oxumağa fasilə verməyi məsləhət görür. Onun fikrincə, bu üsul uşaqda hadisələrin necə davam edəcəyini öyrənmək həvəsi yarada bilər.

"Uşağa kitabı özü seçmək imkanı verin. Bu, komiks, qısa hekayə və ya elmi-kütləvi nəşr ola bilər. Uşaq nə oxuyacağına özü qərar verdikdə, kitaba marağı artır və fikrinə önəm verildiyini hiss edir.

Oxuduğunuz mövzunu real həyatla əlaqələndirərək müzakirə edin. Məsələn, heyvanlar haqqında hekayə oxuduqdan sonra ensiklopediyada həmin heyvanlar barədə məlumat axtarmaq, şəkillərinə baxmaq və ya onları zooparkda canlı görmək olar.

Mütaliəni oyuna çevirin. Rolları bölüşdürmək, hekayə üçün fərqli sonluq düşünmək, qəhrəmanların rəsmini çəkmək və ya kitabdakı səhnələrdən birini canlandırmaq mümkündür".

Psixoloq qeyd edib ki, bu cür fəaliyyətlər uşaqlarda gərginliyi azaldır və mütaliəni birgə yaradıcılıq prosesinə çevirir.

"Müəyyən oxu rejimi yaradın. Məsələn, yatmazdan əvvəl kitaba bir neçə dəqiqə vaxt ayırmaq və ya istirahət günlərində ailəlikcə mütaliə etmək olar. Belə vərdişlər oxumağı gündəlik həyatın adi və səbirsizliklə gözlənilən məşğuliyyətlərindən birinə çevirir.

Kiçik həcmli mətnlərlə başlayın. Uşağın dərhal bütöv bir kitabı oxuması vacib deyil. Qısa hekayələr, şeirlər, komikslər, hətta illüstrasiyaların altındakı yazılar da uyğun seçimdir. Əsas məsələ mütaliəyə müntəzəm vaxt ayırmaq və uşağın qavrama səviyyəsinə uyğun mətnlər seçməkdir", - deyə mütəxəssis fikrini tamamlayıb.

Telegramda izləyin