İbrahim Tatlıses xəstəxanaya yerləşdirildi

Türk musiqisinin tanınmış siması İbrahim Tatlıses xaricdə verdiyi konsertlərdən sonra İstanbuldakı evində qəfil pisləşərək xəstəxanaya aparılıb.

Sonxeber.az türk mediasına istinadən xəbər verir ki, gərgin konsert proqramından sonra evinə qayıdan sənətçinin halı qəfil pisləşib. Hadisə yerinə çağırılan təcili tibbi yardım briqadası tərəfindən o, xəstəxanaya çatdırılıb.

Xəstəxanaya yerləşdirildiyi xəbərindən sonra sənətçinin ailə üzvləri və yaxınları da dərhal ora gəlib. Bildirilir ki, onun vəziyyəti hazırda nəzarət altındadır və həkimlər tərəfindən müalicə prosesi diqqətlə izlənilir.

İddialara əsasən, sənətçi ağır virus infeksiyasına yoluxub. Lakin səhhəti ilə bağlı hələlik rəsmi açıqlama verilməyib. Qeyd olunur ki, o, bir müddət həkim nəzarətində saxlanıla bilər.

Xatırladaq ki, İbrahim Tatlıses 2011-ci ildə silahlı hücuma məruz qaldıqdan sonra uzun müddət müalicə almış və reabilitasiya prosesi keçmişdi. Buna baxmayaraq, o, sonrakı dövrdə yenidən səhnəyə qayıdaraq fəaliyyətini davam etdirirdi. Hazırda sənətçinin son durumu pərəstişkarları tərəfindən maraqla izlənilir.

Telegramda izləyin