"Nikaha daxil olarkən tərəflərdən narkoloji asılılığın olub-olmaması ilə bağlı arayışın tələb edilməsi zəruridir" - AÇIQLAMA

Azərbaycanda nikaha daxil olmaq üçün tələb edilən sənədlərin sayının arıtırlması təklif olunur.

Bunu Milli Məclisin deputatı Göydəniz Qəhrəmanov parlamentin plenar iclasında Əmək Məcəlləsində və "Narkoloji xidmət və nəzarət haqqında" dəyişiklik layihəsinin birinci oxunuşda müzakirəsi zamanı deyib.

O təklif edib ki, nikah bağlanarkən tibbi arayışla yanaşı narkoloji asılılığın olub-olmadığı haqda arayış da tələb edilsin.

Bəs görəsən bu təklifin reallaşmasının nə kimi müsbət tərəfləri ola bilər?

Sosioloq Mətanət Məmmədova bu barədə Sonxeber.az -a danışıb:

"Nikaha daxil olarkən tərəflərdən narkoloji asılılığın olub-olmaması ilə bağlı arayışın tələb edilməsi olduqca düzgün və zəruri bir addım olardı. Bu təşəbbüs xüsusilə aktualdır, çünki çoxsaylı hallarda ailə qurulduqdan bir neçə il sonra tərəflərdən birinin, daha çox isə kişilərin narkotik asılılığının üzə çıxdığının şahidi olmuşuq. Təəssüf ki, belə vəziyyətlər əksər hallarda ailələrin dağılması ilə nəticələnir.

Hətta ailədə uşaq olsa belə, bu cür problemlər münasibətləri xilas etmir. Çünki narkotik asılılığı olan şəxsi bu vərdişdən çəkindirmək çox çətin, bəzən isə mümkünsüz olur. Real həyatda buna dair kifayət qədər nümunələr var. Məsələn, tanıdığım bir ailədə evlilikdən bir neçə il sonra kişinin narkotik asılılığı üzə çıxmışdı. Vəziyyət o həddə çatmışdı ki, o, evdən həyat yoldaşının qızıllarını oğurlayaraq satır və əldə etdiyi pulla narkotik alırdı. Qadın bu həqiqəti öyrəndikdən sonra ailə dağıldı, baxmayaraq ki, onların bir övladı da var idi.

Bu kimi faktlar göstərir ki, insanı nə qədər yaxşı tanıdığını düşünsən də, bəzən ən vacib məqamlar gizli qala bilir. Məhz buna görə də nikahdan əvvəl belə arayışların tələb olunması sağlam və davamlı ailə institutunun formalaşmasına xidmət edə bilər. Bu addım həm mümkün risklərin əvvəlcədən qarşısını almağa, həm də gələcəkdə ailələrin dağılma ehtimalını azaltmağa kömək edər. Ən azı, tərəflər əvvəldən məlumatlı olar, ya münasibətləri dayandırar, ya da problemin həlli üçün vaxtında addım atarlar.

Bu səbəbdən belə bir təşəbbüsün irəli sürülməsi və həyata keçirilməsi təqdirəlayiqdir və dəstəklənməlidir"

Telegramda izləyin