"Ermənistan konkret kilometr ölçüsü ilə irəliləyişi vurğulaması, prosesin simvolik mərhələdən praktik fazaya keçdiyini göstərir" - ŞƏRH

"Yaxın vaxtlarda Ermənistan və Azərbaycan delimitasiya prosesini davam etdirəcəklər".

Bu barədə Ermənistanın baş naziri Nikol Paşinyan Milli Təhlükəsizlik Xidmətinin Sərhəd Qoşunlarının yaradılması münasibətilə keçirilən tədbirdə çıxışı zamanı bildirib.

O qeyd edib ki, Bakı və İrəvan indiyədək 12 kilometrlik ərazidə delimitasiya işlərini həyata keçirib və həmin zonada artıq erməni sərhədçiləri xidmət aparırlar.

"Biz qarşıdan gələn dövrdə, əlbəttə ki, bu prosesi davam etdirəcək və məntiqi çərçivədə başa çatdıracağıq", - deyə hökumət rəhbəri bildirib.

Baş nazirin sözlərinə görə, gündəlikdə, həmçinin Gürcüstanla da sərhədlərin delimitasiyası prosesinin yekunlaşdırılması dayanır və bu barədə gürcü tərəfi ilə razılaşma mövcuddur. Paşinyan əlavə edib ki, delimitasiya və demarkasiya nəticəsində hərbçilər döyüş mövqelərində deyil, daimi dislokasiya yerlərində xidmət edəcəklər.

"Onilliklər ərzində onlar səngərlərdə və mövqelərdə xidmət aparırlar ki, burada da bizə məlum səbəblərdən şərait heç də yaxşı deyil", - deyə o bildirib.

Paşinyan, həmçinin bildirib ki, sərhəddəki güclü istehkamlar və müdafiə qurğuları gələcəkdə sərhəd qoşunlarının nəzarətinə veriləcək. Lakin bu, yalnız Azərbaycanla tam sülh şəraitində baş tutacaq.

"Nikol Paşinyanın delimitasiya prosesinin davam etdirilməsi ilə bağlı açıqlaması, ilk baxışda texniki xarakterli bəyanat təsiri bağışlasa da, əslində regionda formalaşan yeni təhlükəsizlik arxitekturasının mühüm elementidir", - bunu Sonxeber.az -a danışan politoloq Tural İsmayılov deyib:

"Ermənistan tərəfinin artıq konkret kilometr ölçüsü ilə irəliləyişi vurğulaması, prosesin simvolik mərhələdən praktik fazaya keçdiyini göstərir. Bu, eyni zamanda, İrəvanın reallıqları qəbul etməyə məcbur qaldığının dolayı etirafıdır.

Paşinyanın "məntiqi çərçivədə başa çatdırmaq" ifadəsi isə diqqət çəkir. Çünki bu, delimitasiyanın siyasi emosiyalarla deyil, hüquqi və coğrafi əsaslarla aparılacağına işarə edir. Azərbaycanın mövqeyi də məhz bu xətt üzərində qurulub: sərhədlər sovet xəritələri və beynəlxalq hüquq prinsipləri əsasında müəyyənləşdirilməlidir. Bu kontekstdə prosesin uzadılması və ya siyasiləşdirilməsi Bakı üçün qəbuledilməzdir.

Erməni sərhədçilərinin artıq müəyyən hissədə yerləşdirilməsi, hərbçilərin ön xətdən geri çəkilməsi ilə bağlı mesajlar isə daha geniş strateji niyyətin tərkib hissəsidir. Bu, faktiki olaraq sərhəddə hərbiləşmənin mərhələli şəkildə azaldılması və məsuliyyətin institusional strukturlara ötürülməsi deməkdir. Lakin Paşinyanın bu prosesi "tam sülh" şərti ilə bağlaması göstərir ki, İrəvan hələ də yekun siyasi razılaşmanı təhlükəsizlik zəmanəti kimi görür.

Digər tərəfdən, Ermənistanın paralel olaraq Gürcüstanla delimitasiyanı yekunlaşdırmaq niyyəti regional kommunikasiya və sərhəd idarəçiliyi baxımından balanslı siyasət aparmaq cəhdidir. Bu, həm də İrəvanın təkcə Azərbaycan istiqamətində deyil, ümumilikdə sərhəd məsələlərini sistemli şəkildə həll etmək istədiyini göstərir.

Ümumilikdə, bu açıqlama onu deməyə əsas verir ki, delimitasiya artıq alternativsiz prosesə çevrilib. Amma əsas sual dəyişmir: İrəvan bu prosesi sona qədər ardıcıl və siyasi manipulyasiyalardan uzaq davam etdirə biləcəkmi. Regionda dayanıqlı sabitlik məhz bu sualın cavabından asılı olacaq".

Telegramda izləyin