Ailə daxilində tez-tez yaranan münaqişələr nədən qaynaqlanır? - AÇIQLAMA

Ailə daxilində tez-tez yaranan münaqişələr cəmiyyətin ən həssas və aktual problemlərindən biri hesab olunur.

İlk baxışda bu qarşıdurmalar məişət qayğıları, maddi sıxıntılar və ya gündəlik anlaşılmazlıqlar kimi görünsə də, mütəxəssislər bildirirlər ki, məsələnin kökündə daha dərin psixoloji səbəblər dayanır.

Bəs görəsən nədir o psixoloji səbəblər?

Psixoloq Gülsər Qədirli bu barədə Sonxeber.az -a danışıb:

"Ailə daxilində tez-tez yaranan münaqişələrin əsas səbəblərindən biri ünsiyyət çatışmazlığıdır. İnsanlar çox zaman hisslərini açıq şəkildə ifadə etmir, narazılıqlarını içində saxlayır və nəticədə kiçik problemlər zamanla böyüyərək ciddi qarşıdurmaya çevrilir. Dinlənilmədiyini düşünən tərəf aqressivləşə və ya özünə qapana bilər.

Digər mühüm səbəb gözləntilərin üst-üstə düşməməsidir. Həyat yoldaşları ailə, maddiyyat, övlad tərbiyəsi və münasibət modeli ilə bağlı fərqli düşüncələrə sahib olduqda, bu fərqlər konflikt yaradır. Xüsusilə əvvəlcədən müzakirə olunmayan mövzular sonradan problemə çevrilir.

Psixoloji yorğunluq və stress də ailə münasibətlərinə ciddi təsir göstərir. İş yükü, maddi çətinliklər, sosial təzyiqlər və şəxsi problemlər insanın səbir həddini azaldır. Nəticədə insan əsl problemini deyil, ən yaxınında olan ailə üzvünü hədəf seçə bilir.

Bəzi hallarda isə münaqişələrin kökündə uşaqlıq travmaları və əvvəlki ailə modeli dayanır. İnsan böyüdüyü ailədə dava, təhqir və sərt münasibət görübsa, bunu normal davranış kimi qəbul edib öz ailəsində də təkrarlaya bilər.

Belə halların qarşısını almaq üçün tərəflər bir-birini dinləməyi, ittiham yerinə dialoq qurmağı və problemləri vaxtında müzakirə etməyi öyrənməlidir. Əgər münaqişələr davamlı xarakter alırsa, ailə psixoloquna müraciət etmək ən doğru addımlardan biridir. Sağlam ailə münasibəti təsadüfən deyil, qarşılıqlı anlayış və emosional zəhmətlə qurulur".

Telegramda izləyin