Nəsli kəsilmək təhlükəsi altında olan oranqutana elektron siqaret verən məşhur boksçu tənqid atəşinə tutulub - VİDEO

Rusiyalı boksçu Anastasiya Luçkinanın Krımda yerləşən "Taigan Safari Park"da oranqutana elektron siqaret tüstüsü verdiyi görüntülər ictimaiyyətin sərt reaksiyasına səbəb olub.

Sonxeber.az xarici mediaya istinadən xəbər verir ki, sosial media üçün çəkildiyi bildirilən videodan sonra idmançı həm klubundan uzaqlaşdırılıb, həm də Rusiya Boks Federasiyası tərəfindən araşdırmaya cəlb olunub.

Yayılan kadrlarda Luçkinanın qəfəs arxasında olan oranqutana elektron siqareti uzadaraq nikotin buxarını içinə çəkməsinə şərait yaratdığı görünür. Mütəxəssislər bildirirlər ki, bu cür maddələr insanlar üçün belə təhlükəli olduğu halda, heyvanlarda daha ağır sağlamlıq problemlərinə yol aça bilər.

Hadisədən sonra oranqutanda halsızlıq və iştahsızlıq müşahidə olunduğu iddia edilir. Onsuz da nəsli təhlükə altında olan bir canlıya belə müdaxilə edilməsi heyvan rifahına ciddi zərbə kimi qiymətləndirilib.

24 yaşlı idmançıya qarşı ictimai qınaq artdıqdan sonra o, klub sıralarından çıxarılıb. Bundan əlavə, Rusiya Boks Federasiyası tərəfindən rəsmi araşdırmaya start verilib.

Luçkinanın bu addımı sosial şəbəkədə diqqət toplamaq məqsədilə etdiyi iddiası narazılığı daha da artırıb. Heyvan haqları müdafiəçiləri baş verənləri "məşhurluq naminə şüurlu şəkildə zərər vermək" kimi dəyərləndiriblər.

Bir çox heyvan hüquqları təşkilatları hadisəni "qəddarlıq" və "ciddi səhlənkarlıq" adlandırıb. Ekspertlər isə vurğulayıblar ki, bu cür hallar ictimai yerlərdə heyvanların qorunmasına nəzarətin zəif olduğunu da göstərir.

Hadisə sosial mediada geniş müzakirələrə səbəb olub. Çoxsaylı istifadəçilər idmançının idman dünyasından tamamilə uzaqlaşdırılmasını tələb edir. Qalmaqallı görüntülər yenidən "sosial media naminə sərhəd haradadır?" sualını gündəmə gətirib.

Telegramda izləyin