Borca görə ölkədən çıxış qadağası: Yeni qaydalar prosesi necə sürətləndirir? - AÇIQLAMA

Borca görə ölkədən çıxışa məhdudiyyət qoyulması məsələsi son illər vətəndaşlar arasında ən çox müzakirə olunan hüquqi mövzulardan biridir. Bir çox hallarda insanlar borcun mövcudluğunun avtomatik şəkildə belə bir qadağaya səbəb olub-olmadığını dəqiq bilmirlər. Bəs, borca görə ölkədən çıxışa hansı hallarda mədudiyyət qoyula bilər?

Mövzu ilə bağlı Sonxeber.az-a vəkil Turan Abdullazadə danışıb.

O, açıqlamasında qeyd edib ki, icra haqqında qanunun əvvəlki redaksiyasında borclunun ölkədən çıxışını məhdudlaşdırmaq biraz uzun çəkirdi üçün, onlar ölkədən çıxıb qaça bilirdi:

"2025-ci ildə edilən dəyişikliklə bu proses xeyli sürətləndirilib. Artıq borclu şəxs borcunu könüllü icra üçün verilmiş müddətdə üzrsüz səbəbdən ödəmədikdə, icra məmurunun təqdimatı əsasında məhkəmə onun ölkədən çıxışını müvəqqəti məhdudlaşdıra bilər. Məhkəmə bu barədə qərar qəbul edən kimi qərar dərhal "Elektron məhkəmə" sistemindən "Elektron icra" sisteminə ötürülür və oradan da avtomatik olaraq "Giriş-çıxış və qeydiyyat" sisteminə göndərilir. Bunun nəticəsində borclunun ölkədən çıxışına dərhal qadağa tətbiq olunur. Eyni zamanda borcluya bu barədə SMS vasitəsilə məlumat verilir. Əgər sonradan borcun ödənilməsi və ya digər səbəblərlə məhdudiyyətin tətbiqinə əsas qalmırsa, bu məlumat da dərhal sistemə daxil edilir, qadağa avtomatik aradan qaldırılır və borcluya yenidən SMS göndərilir. Beləliklə, yeni qaydalarla bu proses tam elektronlaşdırılıb və həm qadağanın tətbiqi, həm də götürülməsi daha operativ həyata keçirilir".

Vüsalə İbrahimli

Telegramda izləyin