Smartfonun uzunömürlülüyünün sirri: Batareyanı qorumağın yolları

Smartfonlarda istifadə olunan litium-ion batareyalar zamanla öz xüsusiyyətlərini itirir. Çünki təxminən 500 enerji yığma dövründən sonra onların tutumu sürətlə azalır.

Qaynarinfo xəbər verir ki, "Blikk" nəşrinin yazdığına görə, hətta bahalı cihaz sahibləri də fərqinə varmadan batareyanın ömrünü qısaldırlar. Lakin ekspertlər bildirirlər ki, bir neçə sadə qaydaya əməl etməklə batareyanın köhnəlməsini yavaşlatmaq mümkündür.

Mütəxəssislərin sözlərinə görə, telefon intensiv istifadə olunduqda enerji ehtiyatı təxminən ilyarım ərzində kritik həddə çatır və bundan sonra cihaz daha sürətlə enerji itirməyə başlayır.

Nəşr izah edir ki, telefon, planşet və noutbuklarda litium-ion batareyaların istifadə müddəti enerji yığma dövrləri ilə ölçülür. Tam dövr cihazın 0 faizdən 100 faizə qədər enerji ilə doldurulması deməkdir. Dövrlərin sayı artdıqca batareyanın tutumu azalır.

Batareya daxilində baş verən kimyəvi reaksiyalar hər enerji yığma prosesində mikroskopik çöküntülər yaradır. Təxminən 500 tam dövrdən sonra bu çöküntülər kritik həddə çatır və batareyanın strukturuna ciddi zərər vuraraq tutumun kəskin azalmasına səbəb olur.

100 faizi unudun

Ekspertlər smartfonun uzunömürlü olması üçün əsas qaydanı açıqlayıblar: enerji səviyyəsini mümkün qədər 25-85 faiz arasında saxlamaq lazımdır.

Onların sözlərinə görə, litium-ion batareyalar üçün ən böyük yük tam boşalma və tam dolma vəziyyətləridir. Bundan əlavə, telefonu gecə boyu enerji yığmada saxlamaq da batareyanın daha tez köhnəlməsinə səbəb olur.

Batareyanı qorumağın digər yolları

Ekspertlər "kritik faizlər"ə daha az yaxınlaşmaq üçün gündəlik istifadə zamanı bir neçə sadə qaydaya əməl etməyi tövsiyə edirlər:

* ekran parlaqlığını azaltmaq və ya avtomatik tənzimləmədən istifadə etmək;
* arxa fonda işləyən GPS və lazımsız tətbiqlərin bildirişlərini söndürmək;
* günün uzun olacağını bilirsinizsə, batareya tam boşalmadan enerji qənaət rejimini aktivləşdirmək.

Mütəxəssislər hesab edirlər ki, bu dəyişikliklər telefon batareyasının xidmət müddətini əhəmiyyətli dərəcədə uzada və yeni batareya və ya yeni cihaz almaq ehtiyacını gecikdirə bilər.

Texnologiya ilə bağlı digər xəbərlər

Bundan əvvəl smartfonun işini gizli şəkildə yavaşladan dörd tətbiqin adı açıqlanmışdı. Bildirilirdi ki, cihazın sürətini bərpa etmək üçün həmin tətbiqləri silmək vacib deyil - onların arxa fon fəaliyyətini məhdudlaşdırmaq və lazımsız icazələri söndürmək kifayətdir.

Telegramda izləyin