Tez əsəbiləşmənin səbəbi nədir? - AÇIQLAMA

İnsanların tez əsəbiləşməsi çox vaxt xarakter xüsusiyyəti kimi qiymətləndirilsə də, psixoloqlar bunun arxasında daha mürəkkəb səbəblərin dayandığını bildirirlər. Qəzəb əslində insanın özünü təhlükədə, təzyiq altında və ya narahat hiss etdiyi zaman ortaya çıxan təbii emosional reaksiyadır.

Lakin bəzi hallarda bu reaksiya həddindən artıq güclü və tez-tez baş verə bilər.

Bəs görəsən tez əsəbiləşməyin səbəbi nədir?

Psixoloq Gülsər Qədirli bu barədə Sonxeber.az -a açıqlama verib:

"Tez əsəbiləşmənin ən geniş yayılmış səbəblərindən biri xroniki stressdir. Gündəlik həyatda iş yükü, maddi problemlər, ailədaxili münaqişələr və digər gərginlik yaradan amillər insanın emosional ehtiyatlarını tükəndirir. Nəticədə şəxs adi vaxtlarda sakit qarşılayacağı hadisələrə belə sərt reaksiya verə bilir.

Yuxusuzluq və fiziki yorğunluq da əsəbiliyin əsas səbəbləri arasında göstərilir. Kifayət qədər dincəlməyən insanın beyni emosiyaları idarə etməkdə çətinlik çəkir. Bu zaman diqqət dağınıqlığı, səbirsizlik və aqressiv davranışlar daha çox müşahidə olunur.

İnsanın ifadə etmədiyi emosiyalar da sonradan qəzəb şəklində üzə çıxa bilər. Uzun müddət yığılan inciklik, məyusluq və ya kədər bəzən gözlənilməz məqamlarda əsəb partlayışlarına səbəb olur. Bu səbəbdən hisslərin sağlam şəkildə ifadə edilməsi psixoloji sağlamlıq üçün vacib hesab edilir.

Bəzi hallarda tez əsəbiləşmək narahatlıq pozuntuları və ya depressiya ilə əlaqəli ola bilər. Cəmiyyətdə depressiya daha çox kədər hissi ilə əlaqələndirilsə də, onun əsas əlamətlərindən biri də əsəbilik və dözümsüzlükdür. Eyni vəziyyət yüksək təşviş səviyyəsinə malik insanlarda da müşahidə edilir.

Perfeksionist insanlar da tez əsəbiləşməyə daha meylli olurlar. Hər şeyin mükəmməl olmasını gözləyən şəxslər istəkləri reallaşmadıqda və ya planları pozulduqda daha güclü emosional reaksiya verə bilirlər.

Qəzəb əksər hallarda əsas problem deyil, başqa emosiyaların və ehtiyacların göstəricisidir. Buna görə də insan yalnız əsəbini idarə etməyə deyil, onu yaradan səbəbləri anlamağa çalışmalıdır. Kifayət qədər istirahət etmək, stresslə mübarizə üsullarını öyrənmək, fiziki aktivliyi artırmaq və ehtiyac yarandıqda mütəxəssis dəstəyi almaq emosional tarazlığın qorunmasına kömək edə bilər".

Telegramda izləyin