"Yeniyetmələr həmyaşıdları arasında qəbul edilmək üçün populyar brendlərə üstünlük verə bilərlər" - AÇIQLAMA

"Nəzərə alsaq ki, psixologiya sözünün mənası ruh aləmidir və ümumiyyətlə davranışlarımız psixoloji halımızdan xəbər verir, yeniyetmələrin brend məhsullara maraq göstərməsinin də təbii ki, bir neçə əsas psixoloji səbəbi var".

Bu sözləri Sonxeber.az-a psixoloq Samirə Bağırova danışıb.

O, açıqlamasında qeyd edib ki, Yeniyetməlik dövrü insanın özünü tanıdığı və başqalarına necə görünmək istədiyini müəyyənləşdirdiyi bir mərhələdir:

"Geyim və görünüş bəzən insanın xarakterini, özünü və ya sosial mövqeyini ifadə etmə vasitəsinə çevrilir. Buradakı səbəb kimlik formalaşdırma ehtiyacından yaranır.

Digər səbəb qrup tərəfindən qəbul olunmaq istəyidir. Yeniyetmələr həmyaşıdları arasında qəbul edilmək və özlərini qrupa aid hiss etmək üçün populyar brendlərə üstünlük verə bilərlər.

Bəzi tanınmış brendlər uğur, nüfuz və prestijlə əlaqələndirilir. Bu məhsullara sahib olmaq yeniyetmədə özünəinam və status hissini artırdığı düşüncəsini yarada bilər.

Bəzən isə sadəcə təsirə düşməklə brend geyimlərə maraq yarana bilər. Məşhurların, influenserlərin və sosial şəbəkələrdə yayılan reklam xarakterli təsirlərin nəticəsində müəyyən məhsullar daha cəlbedici görünür və yeniyetmələr onları əldə etməyə meyl göstərirlər.

Fərqlənmək və diqqət çəkmək istəyi də səbəblərdən biridir. Məsələ burasındadır ki, brend məhsullara maraq hər zaman mənfi hal deyil. Əsas məsələ odur ki, yeniyetmələr seçimlərini yalnız sosial təzyiq və ya status arzusu ilə deyil, məhsulun keyfiyyəti, faydası və şəxsi ehtiyacları əsasında etməyi öyrənməlidirlər".

Vüsalə İbrahimli

Telegramda izləyin