"Marketinq sahəsində süni intellektin tətbiqi kampaniyaların effektivliyini artırır" - AÇIQLAMA

"Rəqəmsal texnologiyaların sürətli inkişafı fonunda süni intellekt artıq sadəcə texnoloji trend deyil, biznes və marketinq strategiyalarının ayrılmaz tərkib hissəsinə çevrilməkdədir. Bu texnologiya şirkətlərə daha dəqiq məlumat analizi aparmaq, müştəri davranışlarını proqnozlaşdırmaq və fərdiləşdirilmiş təcrübələr yaratmaq imkanı verir".

Bu sözləri Sonxeber.az-a Strateji Kommunikasiya üzrə ekspert Səfər Aslanov danışıb.

O, açıqlamasında qeyd edib ki, xüsusilə marketinq sahəsində süni intellektin tətbiqi kampaniyaların effektivliyini artırır, resurslardan daha optimal istifadə olunmasına şərait yaradır və qərarvermə prosesini sürətləndirir:

"Eyni zamanda, avtomatlaşdırma alətləri sayəsində müştəri ilə ünsiyyət daha operativ və davamlı olur. Nümunə kimi deyə bilərik ki, "PwC"nin proqnozlarına görə, 2030-cu ilə qədər süni intellekt qlobal iqtisadiyyata 15 trilyon dollardan çox əlavə dəyər qazandıra bilər. Bunun da əhəmiyyətli hissəsi məhz müştəriyönümlü sahələrdən, o cümlədən marketinqdən gələcək.

Bununla yanaşı, süni intellektin tətbiqi yalnız texnoloji transformasiya deyil, həm də biznes yanaşmasının dəyişməsini tələb edir. Şirkətlər bu imkanlardan maksimum fayda əldə etmək üçün həm texniki infrastruktur, həm də insan resursları baxımından uyğunlaşma prosesinə diqqət yetirməlidirlər. Məsələn, "Gartner" hesab edir ki, AI inteqrasiyası üçün şirkətlər yalnız texnologiyaya deyil, həm də data mədəniyyətinə və insan kapitalına investisiya etməlidirlər.

Nəticə etibarilə, süni intellektdən düzgün və strateji şəkildə istifadə edən şirkətlər rəqabət üstünlüyü qazanaraq bazarda daha dayanıqlı mövqe əldə edə bilərlər".

Vüsalə İbrahimli

Telegramda izləyin