"Paşinyanın qələbəsi Azərbaycan-Ermənistan sülhyaratma prosesinin yeni mərhələyə adlanması üçün yeni zəminlər yaradır" - DEPUTAT

"Baş nazir Nikol Paşinyanın rəhbərlik etdiyi "Vətəndaş Müqaviləsi" Partiyasının parlament seçkilərindəki qələbəsi,Ermənistanda daxili siyasi proseslərin sabitləşdirilməsi, Azərbaycan-Ermənistan sülhyaratma prosesinin yeni mərhələyə adlanması,Cənubi Qafqazda əmin-amanlığın təmin edilməsi və kommunikasiyaların açılması regional əməkdaşlığın inkişafı və sair bu kimi mühüm istiqamətlərdə yeni zəminlər yaradır".

Bunu Sonxeber.az-a danışan deputat Əli Məsimli bildirib.

Deputat qeyd edib ki, Nikol Paşinyanın qələbəsi geosiyasi qüvvələr nisbətininə,eləcə də Ermənistan cəmiyyətinin və ölkənin geosiyasi asılılığını daha da gücləndirə və iflasa apara bilən revanşizmə, yeni qarşıdurma və yeni müharibəyə, yoxsa sülh gündəliyinə üstünlük verməsi sualına aydınlıq gətirdi:

"Bu qələbə Ermənistanın Rusiyadan qopma və iki ölkə arasında münasibətlərin yeni əsaslarda qurulması prosesini sürətləndirəcək. Amma Ermənistan son illər Rusiyadan asılılığın azaldılması istiqamətində ciddi addımlar atsa da,bu ölkənin ticarət və iqtisadiyyat, enerji sektoru, miqrasiya,pul köçürmələri və sair bu kimi əsas strateji sahələr üzrə Rusiyadan asılılığı yüksək olaraq qalır.Rusiya yönümlü siyasi qüvvələr kontekstində siyasi təsir amilini də bura əlavə etdikdə,görünən budur ki, bu sadalanan amillərlə şərtlənən şəraitdə Ermənistanın Rusiyadan qopma proses mərhələli şəkildə gedəcək.

Nikol Paşinyanın qələbəsi onun Ermənistanın Qərbə inteqrasiyasının dərinləşdirilməsi səylərinin və bu prosesin nəticəliliyin daha da artırılması üçün əlverişli şərait yaradır. Bununla yanaşı Nikol Paşinyanın bu qələbəsi, ötən ilin avqustunda əldə edilən Vaşinqton razılaşmasında Azərbaycanla sülh və əməkdaşlıq üzrə nəzərdə tutulan tədbirlərin reallaşdırılması işini,o cümlədən Zəngəzur Dəhlizinin açılması istiqamətində əməli fəaliyyəti sürətləndirəcəyi qənaəti yaradır. ABŞ-ın dəstəklədiyi bu tranzit yolunun işə düşməsi Azərbaycan-Ermənistan münasibətləri ilə yanaşı,son zamanlar Ermənistan-Türkiyə münasibətlərində pozitiv məcrada görülən işlərin və əldə edilən nəticələrin genişləndirilməsi işinə də müsbət təsir göstərəcək, həm də bütövlükdə region ölkələri üçün faydalı olacaq.

Deputat vurğulayıb ki, Azərbaycan və Ermənistan arasında davamlı sülh müqaviləsinin imzalanması və sərhədlərin delimitasiyası, qarşılıqlı faydalı iqtisadi əlaqələrin genişləndirilməsi kimi məsələlərin həlli sürətlənəcək:

"Ermənistandakı seçkilərin nəticələri İkinci Qarabağ müharibəsinin nəticələrinin möhkəmlənməsi və postmüharibə dövründə Cənubi Qafqazda formalaşmış yeni geosiyasi düzenin, Azərbaycanın sülh strategiyasını yürütmək sahəsindəki konstruktiv və qətiyyətli mövqeyinin effektiv kombinasiyası növbəti siyasi təsdiqidir.Azərbaycanın 44 günlük Vətən müharibəsində əldə etdiyi tarixi qələbə regionda yaratdığı yeni reallıqlar sərhədləri beynəlxalq səviyyədə təsdiqləyir.Paşinyanın qələbəsi ilə davam etdiriləcək siyasi kurs,bu reallıqların tanınması və ərazi bütövlüyü çərçivəsində regional inteqrasiyanın dərinləşməsi üçün imkanlar açır.

Ermənistandakı parlament seçkiləri Azərbaycan üçün bölgədə dayanıqlı sülhün, sabitliyin, təhlükəsizliyin və sıx inteqrasiya olunmuş əməkdaşlıq formatının yaranması baxımdan mühüm əhəmiyyət kəsb edir.Bu kontekstdə Paşinyanın qarşısında duran əsas məsələ Ermənistan hakimiyyətinin indiyədək yerinə yetirmədiyi öhdəliklərə əməl etməklə Azərbaycanla yekun sülh sazişinə nail olmaqdır. Bakı yekun sülh sazişinin imzalanmasının vacib şərtlərindən biri kimi Ermənistan Konstitusiyasında Azərbaycana qarşı ərazi iddialarını özündə ehtiva edən müddəaların dəyişdirilməsini tələb edir. Nikol Paşinyanın, bu yeni qələbə ilə hakimiyyətdə qalması nəticəsində yaranan yeni imkanları fonunda həm Ermənistan,həm Azərbaycan,həm də bütövlükdə regionumuz üçün perspektivli nətiələrə nail olmaqdan ötrü onun Azərbaycanın ərazi bütövlüyünün tanınması və sülh sazişinin bağlanması istiqamətində indiyədək səsləndirdiyi bəyanatların praktiki effekt verməklə gerçəkləşməsi istiqamətində fikirdə,sözdə və əməldə üst-üstə düşən real addımlar atmalıdır".

Telegramda izləyin