Məktəbdə "TikTok"un yaratdığı təhlükələrin qarşısını necə alaq? - AÇIQLAMA

Sosial şəbəkələrin həyatımızın ayrılmaz hissəsinə çevrildiyi bir dövrdə məktəblilərin bu platformalardan istifadəsi ciddi müzakirə mövzusudur. Xüsusilə "TikTok" kimi qısa video platformaları uşaqlar və yeniyetmələr arasında böyük populyarlıq qazanıb.

Bununla yanaşı, təhlükəli çağırışlar, zorakılıq məzmunu, kibertəzyiq və vaxtın səmərəsiz istifadəsi kimi risklər valideynləri və təhsil mütəxəssislərini narahat edir.

Bəs məktəblərdə "TikTok"un yaratdığı təhlükələr nələrdir və şagirdləri bu risklərdən qorumaq üçün hansı addımlar atılmalıdır?

Mövzu ilə bağlı təhsil eksperti Şəmsi Qoca Sonxeber.az -a açıqlama verib:

"Azərbaycan təhsilinin və gənc nəslin mənəvi formalaşmasının qarşısında duran ən mühüm vəzifələrdən biri də məktəb mühitini yad, zərərli təsirlərdən qorumaqdır. Bu baxımdan, ayın 1-dən etibarən təhsil müəssisələrində ümumi internet şəbəkəsi üzərindən "TikTok" sosial platformasına girişin tamamilə məhdudlaşdırılması xüsusi rəğbətlə qarşılanan, prinsipial bir addımdır. Bu qərar təkcə daxili nizam-intizamın gücləndirilməsinə deyil, həm də dövlətimizin yürütdüyü sağlam gənclik və güclü vətənpərvərlik siyasətinə birbaşa xidmət edir.
Məktəb hər şeydən əvvəl elm, bilik və tərbiyə ocağıdır. Qısa, dinamik və çox vaxt heç bir intellektual yükü olmayan vizual effektli videolar yeniyetmələrin psixologiyasında sürətli asılılıq yaradaraq, onların diqqətini tamamilə parçalayır. Dərs zamanı və ya tənəffüsdə bu platformada vaxt keçirmək şagirdlərin müəllimə, dərsliyə və öyrənmə prosesinə olan marağını minimuma endirirdi. İnternet səviyyəsində qoyulan bu qadağa məktəbi öz fundamental funksiyasına - dərsin və elmin aurasına qaytarmaq məqsədi daşıyır.
Bu qərarın ən kəsərli və əhəmiyyətli tərəfi odur ki, artıq məktəbə gizlicə mobil telefon gətirən şagirdlər də bu platformadan istifadə edə bilməyəcəklər. Çünki təhsil müəssisəsinin daxili şəbəkəsində tətbiq olunan ümumi filtrasiya cihazın kimə məxsus olmasından asılı olmayaraq, həmin tətbiqin fəaliyyətini tamamilə dondurur. Bu isə o deməkdir ki, qaydaları pozub sinfə gizli telefon keçirən gənclər belə, dərsin ritmindən qaçıb virtual dünyanın aldadıcı mühitində gizlənə bilməyəcəklər; telefon məktəb divarları arasında onlar üçün sadəcə lazımsız bir əşyaya çevriləcək.
Biz hər zaman gənclərimizin milli-mənəvi dəyərlərə sadiq, vətənə layifli, ayıq-sayıq və yüksək intellektli əsgərlər kimi yetişməsini hədəfləyirik. Təəssüf ki, bu gün sözügedən şəbəkədə yayılan bir çox zərərli kontentlər yeniyetmələrin dünyagörüşünə və estetik zövqünə ciddi zərbə vurur, onları real həyatdan, mütaliədən və canlı ünsiyyətdən uzaqlaşdırırdı. Virtual aləmdə rəylər və "bəyənmələr" (like) arxasınca qaçan şagirdlər real dostluqdan məhrum olurdular. İndi isə virtual qapanma halları azalacaq, gənclər bir-biri ilə sağlam ünsiyyət qurmağa, idman sahələrinə yönəlməyə və real sosial fəaliyyətlərə daha çox vaxt ayırmağa başlayacaqlar.
Məktəblərdə bu növ profilaktik və qətiyyətli addımların atılması gənc nəslin psixoloji, mənəvi və fiziki sağlamlığına dövlət səviyyəsində verilən yüksək dəyərin bariz nümunəsidir. Elm ocağı yalnız bilik verməməli, həm də gəncliyi hər növ yad təsirlərdən mühafizə etməlidir. Atılan bu mühüm addım məktəblərimizdə nizam-intizamı bərpa etməklə yanaşı, gələcəyimiz olan gənclərin milli ruhda, sağlam və kamil şəxsiyyət kimi yetişməsinə güclü təkan verəcəkdir".

Telegramda izləyin