Ekvadorda prezidentin ailə biznesini araşdıran polyak fəal qətlə yetirilib

Ekvadorda korrupsiya ilə mübarizə aparan və ölkənin sağçı prezidentinin ailə biznesinə qarşı ittihamları araşdıran polyak fəal qadın qətlə yetirilib.

Oxu.Az xəbər verir ki, bu barədə "The Guardian" nəşri məlumat yayıb.

Məlumata görə, 41 yaşlı Monika Silva Koniuşek iyunun 8-də Ekvadorun Santa-Elena əyalətinin sahil şəhəri Montanitadakı evində ölü tapılıb. Qeyd edilib ki, Ekvadorun daxili işlər naziri Con Reymberq ilkin ehtimalın intihar olduğunu bildirib.

Lakin sonradan Ekvador Qadın Hüquqlarının Müdafiəsi və Təşviqi Mərkəzinin rəhbəri, hüquqşünas Lita Martines ekspertiza rəylərinə əsaslanaraq ölümün cinayət nəticəsində baş verdiyini təsdiqləyib.

Bildirilir ki, fəal təxminən 10 il ərzində yerli media nümayəndələri ilə birlikdə işləyərək rəqəmsal platformalarda korrupsiya hallarına və ekoloji qanun pozuntularına qarşı aktiv mübarizə aparıb.

Həmkarlarının sözlərinə görə, Silva Koniuşek sağçı prezident Daniel Noboanın ailəsinə məxsus meyvə konqlomeratı olan "Noboa Trading" şirkəti ilə bağlı araşdırmaya başlamışdı. Onlar bildiriblər ki, fəal "Noboa Trading"ə məxsus banan konteynerlərindən bir neçə ton kokainin çıxarıldığı barədə iddiaları araşdırırdı, lakin Ekvadorun yüksək vəzifəli məmurları istintaqı yubadıblar. Ölümündən az əvvəl o, dostlarına ittihamlarla bağlı dosyeni Kito şəhərindəki ABŞ səfirliyinə təqdim etdiyini deyib. O, həmçinin Santa-Elena əyalətində nüfuzlu siyasi xadimlərin genişmiqyaslı qanunsuz torpaq alveri şəbəkəsinə qarışması barədə iddiaları araşdırırdı.

Telegramda izləyin