Xırdalanda antisanitar vəziyyət: Konteynerlərin yerinin dəyişdirilməsi narazılıq yaradıb

Abşeron rayonunun Xırdalan şəhərində məişət tullantılarının yol kənarında qalaqlanması sakinlərin narazılığına səbəb olub.

Oxu.Az xəbər verir ki, bununla bağlı sosial şəbəkədə paylaşım edilib.

Qeyd olunub ki, "AAAF park" ərazisində məişət tullantıları üçün nəzərdə tutulan konteynerlər götürüldüyü üçün sakinlər zibili yol kənarına atırlar, bu isə antisanitar vəziyyətin yaranmasına səbəb olur.

Oxu.Az-ın sorğusuna cavab olaraq Abşeron Rayon İcra Hakimiyyətindən bildirilib ki, sözügedən ərazi üzrə məişət tullantılarının daşınması Abşeron Rayon Abadlıq-Kommunal Xidmətlər İdarəsi ilə bağlanmış müqavilə əsasında həyata keçirilir:

"Ərazidə konteynerlərin yerləşdirilməsi və onların konkret yerlərinin müəyyən edilməsi isə yaşayış kompleksinin daxili təsərrüfat məsələlərinə aid olmaqla onun idarəedici qurumu tərəfindən həyata keçirilir. Məlumata görə, ərazidə yerləşən tullantı konteynerlərinin yeri müəyyən səbəblərdən dəyişdirildiyindən sakinlərin bir qismi əvvəlki vərdiş üzrə məişət tullantılarını həmin əraziyə çıxarmaqda davam edib və nəticədə qısa müddətli antisanitar vəziyyət yaranıb.

Məsələ ilə bağlı tərəfimizdən aidiyyəti qurumla əlaqə saxlanılıb, tullantıların ərazidən daşınması və konteynerlərin yerləşdirilməsi ilə bağlı zəruri tədbirlər görülür. Məqsəd sakinlərin məişət tullantılarının vaxtında toplanması və ərazidə sanitar vəziyyətin qorunmasının təmin edilməsidir".

Telegramda izləyin