Həddindən artıq məsuliyyət hissi insanın psixi sağlamlığında hansı izlər buraxır? - AÇIQLAMA

Bəzən məsuliyyətli olmaq müsbət xüsusiyyət kimi qiymətləndirilsə də, bu hissin həddindən artıq olması insanın həm emosional, həm də fiziki sağlamlığına mənfi təsir göstərə bilər.

Belə insanlar ətrafdakıların problemlərini öz üzərlərinə götürür, hər şeyə nəzarət etməyə çalışır və ən kiçik uğursuzluqda belə özlərini günahlandırırlar.

Bəs həddindən artıq məsuliyyət hissi insanın psixi sağlamlığında hansı izlər buraxır?

Psixoloq Gülsər Qədirli bu barədə Sonxeber.az -a açıqlama verib:

"Həddindən artıq məsuliyyət hissi insanın öz üzərinə real imkanlarından daha çox yük götürməsi ilə xarakterizə olunur. Bu insanlar adətən hər şeyin onların nəzarətində olmalı olduğunu düşünür, baş verən mənfi hadisələrə görə özlərini cavabdeh hesab edirlər. Nəticədə daimi gərginlik və narahatlıq vəziyyətində yaşayırlar.

Belə hallarda insanın stress səviyyəsi yüksəlir, beyin fasiləsiz şəkildə problemləri həll etməyə çalışdığı üçün emosional yorğunluq yaranır. Zaman keçdikcə bu vəziyyət təşviş pozuntularına, yuxu problemlərinə, diqqət dağınıqlığına və hətta depressiv əlamətlərə səbəb ola bilər.

Həddindən artıq məsuliyyət hissi olan insanlar çox vaxt "yox" deməkdə çətinlik çəkirlər. Onlar başqalarını məyus etməkdən qorxduqları üçün öz ehtiyaclarını arxa plana keçirirlər. Bu isə daxili narazılıq, tükənmişlik sindromu və emosional boşluq hissi yarada bilər.

Bəzi hallarda bu xüsusiyyət uşaqlıq dövründə formalaşır. Erkən yaşlardan ailədə və ya ətraf mühitdə həddindən artıq məsuliyyət daşımağa məcbur olan şəxslər böyüdükdə də hər kəsin yükünü çiyinlərində daşımalı olduqlarına inanırlar.

Sağlam psixoloji vəziyyət üçün insan məsuliyyət və şəxsi sərhədlər arasında balans yaratmağı öyrənməlidir. Hər problemin həlli üçün təkbaşına cavabdeh olmadığını qəbul etmək, lazım gəldikdə kömək istəmək və öz ehtiyaclarına da diqqət ayırmaq psixi sağlamlığın qorunmasında mühüm rol oynayır".

Telegramda izləyin